ކުރިން ލޮކްޑައުން ކުރިއިރު ދޫކުރި ފާސްތައް މިހާރު ބޭނުން ނުކުރެވޭނެ ކަމަށް ފުލުހުން ބުނެފިއެވެ.
ފުލުހުން ބުނީ ކުރިން ލޮކްޑައުން ކުރި އިރު ދޫކޮށްފައިވާ ފާސްތައް ބައެއް ފަރާތްތަކުން ބޭނުން ކުރަމުން ގެންދާކަން ފާހަގަ ކުރެވިފައިވާ ކަމަށެވެ. އެހެންނަމަވެސް ކުރިން ދޫކޮށްފައިވާ ފާސް މީހާރު ބޭނުން ނުކުރެވޭނެ ކަމަށް ފުލުހުން ވަނީ ބުނެފައެވެ.
އެގޮތުން ވެހިކަލް ދުއްވުން މަނާ ގަޑީގައާއި ކާފިއު ވަގުތު ޒަރޫރީ ބޭނުންތަކަށް ބޭރަށް ނުކުތުމަށް ޕޯޓަލް މެދުވެރިކޮށް ހުއްދައަށް އެދުމަށް އިލްތިމާސްކުރާ ކަމަށެވެ.
މާލެ ސަރަހައްދުގައި ވެހިކަލް ދުއްވުމާއި މީހުން ނުކުމެ އުޅުން މަނާ ވަގުތުތަކުގައި ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް ޕޮލިސްގެ ޕާމިޓް ޕޯޓަލް މެދުވެރިކޮށް ހުއްދައަށް އެދެވޭނެ އިންތިޒާމު މިހާރު ވަނީ ހަމަޖެހިފައެވެ.
އެގޮތުން، ހުއްދަ ދެވޭނީ ޑިއުޓީ ނުވަތަ މަސައްކަތަށް ދިއުމަށާއި އައުމުގެ އިތުރުން އެއާޕޯޓް ޓްރާންސްފާ އާއި ކާބޯތަކެތި ޑެލިވަރކުރުމަށް ކެފޭ/ރެސްޓޯރެންޓުތަކަށް ކަމަށް ފުލުހުން ބުނެއެވެ.
މާލޭގައި ކޮވިޑް ކޭސްތައް އިތުރު ވުމާއި ގުޅިގެން ކޮވިޑް ކޮންޓްރޯލް ކުުރުމަށް އިއްޔެއިން ފެށިގެން ވަނީ މާލެ ސިޓީގައި އިތުރު ފިޔަވަޅުތަކެއް އަޅާފައެވެ. އެގޮތުން ހަވީރު 6:00 އިން ހެނދުނު 6:00 އަށް އެއްގަމު އުޅަނދުފަހަރު ދުއްވުން ވަނީ މަނާކޮށްފައެވެ. އަދި ރޭގަނޑު 11:00 އިން ފަތިހު 4:30 އަށް މަގުމައްޗަށް ނުކުތުންވެސް ވަނީ މަނާކޮށްފައެވެ.
