ފަޅުވެރިއެއްގެ ލޮލަށް ބުޅިއެއް ހެރިގެން އަވަސް ފަރުވާއަށް ހދ. ކުޅުދުއްފުއްޓަށް ގެންގޮސްފިއެވެ.
މިކަމާ ގުޅިގެން އެމްއެންޑީއެފުން ބުނީ، ކުޅުދުއްފުށީ ބޮއި ކައިރިން މަސްވެރިކަން ކުރަން އުޅުނު "ނިއުމަތް" ދޯނީގައި ހުރި މީހެއްގެ ލޮލަށް ބުޅިއެއް ހެރި ޒަހަމް ވެފައިވާ ކަމުގެ މައުލޫމާތު ލިބިފައިވާ ކަމަށެވެ. މި ހާދިސާގައި އަނިޔާވެފައި ވަނީ އުމުރުން 35 އަހަރުގެ ދިވެހި ފަޅުވެރިއަކަށް ކަމަށް އެމްއެންޑީއެފުން ބުނެއެވެ.
މިހާރު އެ މީހާ ވަނީ އެމްއެންޑީއެފް ނޮދާން އޭރިއާ ކޯސްޓްގާޑް ސްކޮޑްރަންގެ އެހީތެރިކަމާއެކު ކުޅުދުއްފުށީ ރީޖަނަލް ހޮސްޕިޓަލަށް ގެންގޮސްފައެވެ.
މަސްވެރިކަމަށް ނިކުމެ އުޅޭ މަސްވެރިންނަށާއި، ދޯނިތަކުގެ ފަޅުވެރިންގެ ލޮލަށް ބުޅި ހެރި އަނިޔާވާ ހާދިސާތައް މީގެ ކުރިން ވެސް ވަނީ ފެންމަތިވެފައެވެ. އެގޮތުން، މިފަދަ ހުރިހާ ހާދިސާއެއްގައި ވެސް އެމްއެންޑީއެފުން ދަނީ އާންމުންނަށް އެހިތެރިކަން ފޯރުކޮށްދެމުންނެވެ.
މިފަހުން ހިނގާފައިވާ މިފަދަ ހާދިސާތަކަށް ބަލާލާއިރު، ކ. އެނބަދޫ ފިނޮޅުގެ އިރު ދެކުނުން 6.5 ނޯޓިކަލް މޭލު ބޭރުގައި މަސްވެރިކަމުގައި އުޅުނު "ވިލާ ވާލި" ދޯނީގައި ހުރި 22 އަހަރުގެ ދިވެހި ޒުވާނެއްގެ ލޮލަށް ބުޅިއެއް ހެރިގެން މިދިޔަ ނޮވެމްބަރު 26ގައި އެމްއެންޑީއެފުން ވަނީ އެހީތެރިކަން ފޯރުކޮށްދީފައެވެ. އެމްއެންޑީއެފްގެ އެހީގައި އެމީހާ ގެންގޮސްދީފައި ވަނީ ހުޅުމާލެއެވެ.
އަދި މ. ކޮޅުފުށި ދެކުނުން 11 ނޯޓިކަލް މޭލު ބޭރުގައި މަސްވެރިކަމުގައި އުޅުނު "އަލިރާސްތާ-1" ނަމަކަށް ކިޔާ ދޯންޏެއްގައި ހުރި ފަޅުވެރިއެއްގެ ލޮލަށް ބުޅިއެއް ހެރިގެން އެމްއެންޑީއެފުން ވަނީ އެހީތެރިކަން ފޯރުކޮށްދީފައެވެ. އެމްއެންޑީއެފްގެ އެހީގައި އެމީހާ ގެންގޮސްދީފައި ވަނީ މ. މުއްޔަށެވެ.
