ކޮވިޑް ޖެހިގެން ރޭ 59 އަހަރުގެ މީހަކު މަރުވެ، ރޭ ކޮވިޑް ޖެހިގެން މަރުވި މީހުންގެ އަދަދު 2 އަށް އަރައިފިއެވެ.
އެޗްޕީއޭއިން މައުލޫމާތު ދޭ ގޮތުގައި ރާއްޖޭގައި ކޮވިޑް ޖެހިގެން ރޭމަރުވި ދެވަނަ މީހާއަކީ އުމުރުން 56 އަހަރުުގެ ދިވެހި އަންހެނެކެވެ. އޭނާ އައިޖީއެމްއެޗް ހޮސްޕިޓަަލަށް ގެންގޮސްފައި ވަނީ ރޭ 3:17 ހާއިރެވެ. ހޮސްޕިޓަލަށް ގެންދިޔައިރު އެއްވެސް ހަރަކާތެއް ނެތް އިރު، އޭނާގެ މަރު ކަށަވަރު ކޮށްފައި ވަނީ ރޭ 3:46 ގައެވެ. އޭނާ ކޮވިޑަށް ޕޮޒިޓިވްކަން އެނގުނީ އައިޖީއެމްއެޗަށް ގެންދިއުމަށް ފަހު ހެދި ޓެސްޓަކުންނެވެ.
އެޗްޕީއޭއިން ބުނީ، މިއީ ކޮވިޑުގައި ރާއްޖެއިން މަރުވި 58 ވަނަ މީހާ ކަމަށެވެ. މިއީ މި ފެބްރުއަރީ މަހުވެސް ކޮވިޑް ޖެހިގެން މަރުވި 6 ވަނަ މީހާއެވެ. އަދި ވޭތުވެދިޔަ ހަފްތާ ތެރޭގައި ކޮވިޑް ޖެހިގެން މަރުވި 4 ވަނަ މީހާއެވެ. އަދި ރޭގެ ވަގުތެއްގައި ކޮވިޑް ޖެހިގެން މަރުވި ދެވަނަ މީހާ އެވެ.
ރާއްޖެއިން ކޮވިޑް ފެނުނު ފަހުން، އެ ބަލީގައި މަރުވި މީހުންގެ އަދަދު މިހާރު ވަނީ 58 އަށް އަރާފައެވެ. މަރުވި މީހުންގެ ތެރޭގައި ހިމެނެނީ 51 ދިވެހިންނާއި 7 ބިދޭސީންނެވެ. މަރުވި ބިދޭސީންގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި ފިލިޕީންސް މީހެކެވެ. ރާއްޖެއިން ކޮވިޑް ޖެހިގެން މަރުވި 58 މީހުންގެ ތެރެއިން 56 މީހަކު މާލެ ސަރަހައްދުގައި މަރުވެފައި ވާއިރު، 2 މީހަކު މަރުވީ އަތޮޅު ތެރޭގެ ރަށްތަކުންނެވެ.
މީގެ އިތުރުން، އެޗްޕީއޭއިން ބުނެފައި ވަނީ ޕޮޒިޓިވް ކޭސްތަކުގެ ތެރޭގައި ހިމެނޭ 7 މީހަކު މަރުވެފައި ވާއިރު އެއީ ކޮވިޑް މަރު ނޫން ކަމަށް ނިންމާފައިވާ ކަމަށެވެ. ހަމައެއާއެކު ދުބާއީގައި ހުއްޓާ ކޮވިޑް ޖެހިގެން ދިވެއްސަކު ވަނީ މަރުވެފައެވެ. އެއީ އުމުރުން 38 އަހަރުގެ ދިވެހި ފިރިހެނެކެވެ
