ކޮވިޑް ޖެހިގެން ރާއްޖެއިން 78 އަހަރުގެ މީހަކު މަރުވެއްޖެއެވެ.
އެޗްޕީއޭއިން މައުލޫމާތު ދޭ ގޮތުގައި ރާއްޖޭގައި ކޮވިޑް ޖެހިގެން މަރުވެފައި ވަނީ އުމުރުން 78 އަހަރުުގެ ދިވެހި އަންހެނެކެވެ. އަދި ރޭ 8:12 ހާއިރު އައިޖީއެމްއެޗް ހޮސްޕިޓަލުގެ އެމަޖެންސީއަށް އޭނާ ގެންދިޔަ އިރުވެސް މަރުވެފައިވާ ކަމަށް އެޗްޕީއޭއިން ބުނެއެވެ. އޭނާ ކޮވިޑަށް ޕޮޒިޓިވްކަން އެނގުނީ އައިޖީއެމްއެޗަށް ގެންދިއުމަށް ފަހު ހެދި ޓެސްޓަކުންނެވެ.
އެޗްޕީއޭއިން ބުނީ، މިއީ ކޮވިޑުގައި ރާއްޖެއިން މަރުވި 57 ވަނަ މީހާ ކަމަށެވެ. މިއީ މި ފެބްރުއަރީ މަހުވެސް ކޮވިޑް ޖެހިގެން ނިޔާވި 5 ވަނަ މީހާއެވެ. އަދި ވޭތުވެދިޔަ ހަފްތާ ތެރޭގައި ކޮވިޑް ޖެހިގެން ނިޔާވި 3 ވަނަ މީހާއެވެ.
ރާއްޖެއިން ކޮވިޑް ފެނުނު ފަހުން، އެ ބަލީގައި މަރުވި މީހުންގެ އަދަދު މިހާރު ވަނީ 57 އަށް އަރާފައެވެ. މަރުވި މީހުންގެ ތެރޭގައި ހިމެނެނީ 50 ދިވެހިންނާއި 7 ބިދޭސީންނެވެ. މަރުވި ބިދޭސީންގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި ފިލިޕީންސް މީހެކެވެ. ރާއްޖެއިން ކޮވިޑް ޖެހިގެން ނިޔާވި 57 މީހުންގެ ތެރެއިން 55 މީހަކު މާލެ ސަރަހައްދުގައި މަރުވެފައި ވާއިރު، 2 މީހަކު މަރުވީ އަތޮޅު ތެރޭގެ ރަށްތަކުންނެވެ.
މީގެ އިތުރުން، އެޗްޕީއޭއިން ބުނެފައި ވަނީ ޕޮޒިޓިވް ކޭސްތަކުގެ ތެރޭގައި ހިމެނޭ 7 މީހަކު މަރުވެފައި ވާއިރު އެއީ ކޮވިޑް މަރު ނޫން ކަމަށް ނިންމާފައިވާ ކަމަށެވެ. ހަމައެއާއެކު ދުބާއީގައި ހުއްޓާ ކޮވިޑް ޖެހިގެން ދިވެއްސަކު ވަނީ މަރުވެފައެވެ. އެއީ އުމުރުން 38 އަހަރުގެ ދިވެހި ފިރިހެނެކެވެ
