ކުރިއާ އަޅާ ބަލާއިރު މިހާރު ރާއްޖޭގައި ކޮވިޑްގެ ހާލަތު ގޯސްވެއްޖެ ކަމަށް ހެލްތު އިމަޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ފާތުމަތު ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ ވިދާޅުވީ، މިހާރު ރާއްޖެއަށް ކުރިމަތިވެފައި މިވަނީ މިހާތަނަށް ރާއްޖެއަށް އައި ކޮވިޑުގެ އެންމެ ބިޔަ އެންމެ ނުރައްކާތެރި ރާޅު ކަމަށެވެ. އެގޮތުން ކޮވިޑު ޖެހޭ މީހުންގެ އަދަދު އިންތިހާއަށް ގިނަވެ، ހޮސްޕިޓަލްގައި ފަރުވާ ދޭން ޖެހޭ މީހުން ވެސް ގިނަވެފައިވާ ކަމަށް ނަޒްލާ ވިދާޅުވިއެވެ.
އެގޮތުން ހެލްތު ނިޒާމަށް ވެސް މިހާރު ބުރަބޮޑުވެފައިވާ ކަމަށާއި ބަލި މީހުންނަށް ފަރުވާދޭން ހުރި އެނދުތައް ގާތްގަނޑަކަށް ފުރިފައިވާ ކަމަށް ޑރ. ނަޒްލާ ވިދާޅުވިއެވެ.
މި އަހަރު ފެށުނު ފަހުން އަނެއްކާ ވެސް ރާއްޖޭގައި ކޮވިޑް ކޭސްތައް މި ވަނީ އިތުރު ވާން ފަށާފައެވެ. އެގޮތުން މިހާރު ކޮވިޑް ޖެހުނު ޖުމްލަ މީހުންގެ އަދަދު މި ވަނީ 17000 އިން މައްޗަށް ގޮސްފައެވެ.
ކޭސްތައް އިތުރު ވަމުން އަންނާތީ އެކަމާ ގުޅިގެން ހަރުކަށި ފިޔަަވަޅުތައް އަޅާނެ ކަމަށް އިކޮނޮމިކް މިނިސްޓަރު އިސްމާއިލް ފައްޔާޒް ވަނީ ވިދާޅުވެފައެވެ.
މާލެ ސަރަހައްދުގައި ރޭގަނޑު 11 އިން ފެށިގެން ފަތިހު 4:30 އަށް ކާފިއު އިއިލާން ކޮށްފައިވާ އިރު މިއަދު ވަނީ މާލެ ސަރަހައްދުގައި އެއްގަމު އުޅަނދުފަހަރު ދުއްވުން މަނާ ވަގުތު އިތުރުކޮށްފައެވެ. އެގޮތުން މިއަދުން ފެށިގެން ހަވީރު 6 އިން ފެށިގެން ހެނދުނު 6 އަށް އެއްގަމު އުޅަނދުފަހަރު ދުއްވުން ވަނީ މަނާ ކޮށްފައެވެ.
މާލެ ސަރަހައްދުގެ އިތިރުން އައްޑޫ އަދި ފުވައްމުލަކުގައި ވަނީ ކާފިއު ޢިއުލާން ކޮށްފައެވެ.
