ކޮވިޑް-19 ގެ ކޭސްތައް ގިނަވަމުންދާތީ މާދަމާއިން ފެށިގެން ޏ.ފުވައްމުލަކުގައި ރޭގަނޑު 08:00 އަކުން ފަތިހު 04:00 އަކަށް ކާފިއު ހިންގަން ހެލްތް ޕްރޮޓެކްޝަން އެޖެންސީ އެޗްޕީއޭން ނިންމައިފިއެވެ.
އެޗްޕީއޭއިން މިއަދު ނެރުނު އެންގުމެއްގައި ބުނެފައިވަނީ އާންމު ސިއްހަތު ރައްކާތެރިކުރުމުގެ ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން، މާދަމާއިން ފެށިގެން 7 ދުވަހުގެ މުއްދަތަށް ރައްކާތެރިކަމުގެ ފިޔަވަޅެއްގެ ގޮތުން ފުވައްމުލަކު ސިޓީގައި ރޭގަނޑު 08:00 އިން ފެށިގެން ފަތިހު 04:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށްމީހުން ނުކުތުން މަނާކުރާ ކަމަށެވެ.
އެޗްޕީއޭން ވަނީ އެރަށުގެ އެއް އަވަށުން އަނެއް އަވަށަށް ދަތުރުކުރުން ހުއްޓާލަން އަންގާ އެއް ގެއިން އަނެއް ގެއަށް ޒިޔާރަތްކުރުން ހުއްޓައިލުމަށް ވެސް އަންގާފައެވެ.
މީގެ އިތުރުން އެއްފަހަރާ ތިން މީހުންނަށްވުރެ ގިނަމީހުން، މަގުމައްޗާއި އާންމު ތަންތާނގައި އެއްވެ އުޅުން ހުއްޓައިލުމަށް ވެސް އެޖެންސީން ވަނީ އަންގާފައެވެ.
އެޗްޕީއޭން ވަނީ ފުވައްމުލަކު ސިޓީގައި ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓާލަން އަންގާފައެވެ. އަދި މީގެ އިތުރުން ސެލޫންތަކާއި، ޖިމްތަ ކާއި، ބޯކޮށާ ތަންތަން މިހާރުން މިހާރަށް ބަންދުކޮށް ކުޅިވަރުގެ ހުރިހާ ހަރަކާތްތަކާއި، ކަސްރަތު ގެ ހަރަކާތްތައް ހިންގުން ހުއްޓައިލުމަށް ވެސް އެޗްޕީއޭން ވަނީ އަންގާފައެވެ.
އެޗްޕީއޭން ބުނެފައިވަނީ ފުވައްމުލަކުގައިޕަބްލިކް ޓްރާންސްޕޯޓުގެ ޚިދުމަތް ދޭ ފަރާތްތަކުންނާއި ޓެކްސީގެ ޚިދުމަތް ދޭ ފަރާތްތަކުން، އެއެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޕަބްލިކް ޓްރާންސްޕޯޓުގެ ޚިދުމަތާއި ޓެކްސީގެ ޚިދުމަތް ދިނުމަށް އަންގާކަމަށެވެ.
ފުވައްމުލަކުގައި ކޮވިޑްގެ ކޭސްތައް ފެންނަމުންދާ މިދަނޑިވަޅުގައި، އެޗްޕީއޭން ވަނީ އެރަށުގައި ހުންނަ ޔުނިވަރސިޓީތަކާއި، ކޮލެޖްތަކާއި، ސްކޫލުތަކަށް ދަރިވަރުން ހާޒިރުވެގެން ކްލާސްތައް ކުރިޔަށް ގެންދިޔުން ހުއްޓައިލުމަށް ވެސް އަންގާފައެވެ. އަދި .ހޮޓާތަކާއި، ކެފޭތަކާއި، ރެސްޓޯރަންޓް ތަކުން ދެމުންގެންދާ ޚިދުމަތްތައް ހުއްޓާލުމަށް ވެސް އެޗްޕީއޭން އަންގާފައިވާ އިރު އެޖެންސީން ބުނެފައިވަނީ މީގެ ތެރޭގައި ޑެލިވަރީގެ ޚިދުމަތް ދިނުމެއް ނުހިމެނޭ ކަމަށެވެ.
މިހާތަނަށް އެރަށުން 11 ކޮވިޑް ކޭސް ފެނިފައިވާ އިރު އިއްޔެ އިސްލާމިކް މިނިސްޓްރީން ވަނީ ފުވައްމުލަކުގެ ހުރިހާ މިސްކިތްތަކެއްގައި ޖަމާއަތް ހަދައިގެން ނަމާދުކުރުން ހުއްޓާލަން އަންގާފައެވެ.
