ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް ބަހްރައިންގައި ތަންފީޒު ކުރަމުންދާ ހަރުކަށި ފިޔަވަޅުތަކާ ހިލާފުވި ކަމުގެ ކުށުގެ ތުހުމަތުގައި، 15 މީހެއްގެ މައްޗަށް ޖަލު ހުކުމް އިއްވައިފިއެވެ.
ބަހްރައިންގެ ޗީފް އޮފް މިނިސްޓްރީޒް އެންޑް ބޮޑީޒް އޮފް ޕްރޮސެކިއުޝަން އިން ހަބަރު ދޭ ގޮތުގައި، 15 މީހުންގެ މައްޗަށް ޖަލު ހުކުމް އިއްވާފައި ވަނީ، 5 މީހުންނަށް ވުރެ ގިނައިން އާންމު އެއްވުން ނުބޭއްވޭ ގޮތަށް ކަނޑައަޅާފައިވާ އަމުރާ ހިލާފުވުމުގެ ސަބަބުންނެވެ.
15 މީހުންގެ މައްޗަށް އިއްވި ޖަލު ހުކުމްތައް، 3 މަހާއި 6 މަސް ދުވަހުގެ މުއްދަތަކަށް ދެމިގެން ދެއެވެ. މީގެ އިތުރުން 1000 ބަހްރައިނީ ދީނާރުން އެމީހުން ވަނީ ޖޫރިމަނާވެސް ކޮށްފައެވެ.
އާންމު ތަންތަނުގައި 5 މީހުންނަށް ވުރެ ގިނައިން އެއްވެ އުޅުން މަނާ ކޮށްފައި ވާއިރު، އެ އަމުރާ ހިލާފުވި ކަމުގެ ގިނަ ޝަކުވާތަކެއް، ބަހްރައިންގެ ޕަބްލިކް ޕްރޮސެކިއުޝަންއަށް ވަނީ ހުށަހަޅާފައެވެ.
މިމައްސަލަތައް ބަލަނީ ޕަބްލިކް ޕްރޮސެކިއުޝަން އޮފީހުންނެވެ. އެއަށްފަހު، ހުކުމް އިއްވަނީ ކަމާ ގުޅޭ ޖިނާއީ ކޯޓުންނެވެ.
ކޮވިޑް-19 ފެތުރުން ކޮންޓްރޯލް ކުރުމަށް ގައުމުތަކުން ދަނީ ރައްކާތެރި ކަމުގެ ގޮތުން ހަރުކަށި ފިޔަވަޅުތަކެއް ތަންފީޒު ކުރަމުންނެވެ.
