މަކަރާއި ހީލަތުން ފައިސާ ހޯދަމުން ދިޔަ، ޅ. ހިންނަވަރު، އަންބަރީގެ، އިބްރާހިމް ނަޒީދުގެ މައްސަލަ ބަލާ، އޭނާގެ މައްޗަށް ދައުވާ ކުރަން ޕީޖީ އޮފީހަށް ފޮނުވައިފިއެވެ.
ނަޒީދުގެ މައްޗަށް ދައުވާ ކުރަން ފޮނުވާފައި ވަނީ، އޭނާ ސައްހަ ނޫން އެއްބަސްވުންތަކެއް ހަދައިގެން މަކަރާ ހީލަތުން ގިނަ އަދަދެއްގެ ބައެއްގެ އަތުން ފައިސާ ހޯދާފައިވާތީ އެވެ. އެގޮތުން އޭނާ ފައިސާ ހޯދާފައިވަނީ ވަނީ ސައްހަ ނޫން އެއްބަސްވުންތަކެއްގެ ދަށުން ގިނަ އަދަދެއްގެ ބަޔަކަށް އެޕާޓްމަންޓްތަކެއް ކުއްޔަށް ދީގެންނެވެ.
މި މައްސަލައިގެ ތަހުގީގު ނިންމައި، ނަޒީދުގެ މައްޗަށް ދައުވާ ކުރުމަށް ފުލުހުން ޕީޖީ އޮފީހަށް ފޮނުވާފައި ވާއިރު، މި މައްސަލައިގެ ތަހުގީގަށް ފުލުހުން ވަނީ އާންމުންގެ އެހީތެރިކަން ވެސް ހޯދާފައެވެ. އެގޮތުން ނަޒީދުގެ ފޮޓޯއާއި ވަނަވަރު އާންމުކޮށް، އޭނާ މަކަރާ ހީލަތުން ފައިސާ ހޯދާފައިވާ އިތުރު ބަޔަކު ވޭތޯ ބެލުމަށް ފުލުހުން ވަނީ އާންމުކޮށް އިއުލާން ކޮށްފައެވެ.
ތަފާތު ގޮތްގޮތަށް މަކަރާއި ހީލަތުން ފައިސާ ހޯދުމުގެ މައްސަލަތަކަކީ މިހާރަކަށް އައިސް މުޖުތަމައުގައި އިތުރު ވަމުންދާ މައްސަލަތަކެވެ. އެހެންކަމުން ފައިސާއާއި އަގުބޮޑު ތަކެތި ހިމެނޭ މުއާމަލާތްތައް ކުރާއިރު އެކުރެވޭ މުއާމަލާތަކީ ސައްހަ މުއާމަލާތެއްތޯ ކަށަވަރު ކުރުމަށް ސަމާލުކަން ދިނުމަށް ފުލުހުން ދަނީ އިލްތިމާސް ކުރަމުންނެވެ.
އަދި ސައްހަ ނޫން މުއާމަލާތެއް ހިންގުމަށް މަސައްކަތް ކުރާ ކަމަށް ޝައްކު ކުރެވޭ ނަމަ، ލަސް ނުކޮށް އެ މުއާމަލާތެއްގެ މައުލޫމާތު ފުލުހުންނާ ހިއްސާ ކުރުމަށް ވެސް ފުލުހުން އެދެއެވެ.
