އަނަންތަރާ ކިހާވަށް ރިސޯޓުން ކޮވިޑް ކޭސްތަކެއް ފެނިފައިވާ ކަމަށާއި މިހާރު ފެނިފައިވާ ކޭސްތަކުގެ އަދަދު 86 އަށް އަރާފައިވާ ކަމަށް އެޗްއީއޯސީގެ ތަރުޖަމާނު ޑރ. ފާތުމަތު ނަޒްލާ ރަފީގް ވިދާޅުވެއްޖެއެވެ.
ޑރ. ނަޒްލާ ވިދާޅުވީ، އަނަންރަތާ ރިސޯޓުން ކުރިން ފެނުނު ކޭސްތަކަކާ ގުޅިގެން އެ ރިސޯޓުން ނެގި ރެންޑަމް ސާމްޕަލްގެ ނަތީޖާތައް ލިބުނު އިރު އިއްޔެ ނޫން އިހަށް ދުވަހު 4 ކޭސް އާއި އިއްޔެ އިތުރު 2 ކޭސް ފެނިފައިވާ ކަމަށެވެ.
އެއާއެކު އެ ރިސޯޓުން ޕޮޒިޓިވް ވި މީހުންގެ އަދަދު 86 އަށް އަރާފައިވާ ކަަމަށް ނަޒްލާ ވިދާޅުވިއެވެ.
އަނަންތަރާ ކިހާވަށް ރިސޯޓުން ކޮވިޑަށް ޕޮޒިޓިވްވާ މީހުން އިތުރުވަމުން ދާއިރު، އޮބްލޫ ސަންގެލި ރިސޯޓުން ފެނުނު ކޭސްތަކުގެ އަދަދު ވަނީ 102 އަށް އަރާފައެވެ. ހަމައެއާއެކު ރެސިޑެންސް މޯލްޑިވްސް އިން ޕޮޒިޓިވް ވި މީހުންގެ އަދަދު ވަނީ 20 އަށް އަރާފައެވެ.
ރާއްޖެއިން ޕޮޒިޓިވް ވާ މީހުންގެ އަދަދު އިތުރު ވެފައި ވާއިރު، ޕޮޒިޓިވް ވި މީހުންގެ ޖުމްލަ އަދަދު ވަނީ 16،783 އަށް އަރާފައެވެ.
އޭގެ ތެރެއިން މިއަދު 48 މީހަކު ރަނގަޅުވެފައި ވާއިރު ބަލިން ރަނގަޅުވި ޖުމްލަ މީހުންގެ އަދަދު ވަނީ 14،604 އަށް އަރާފައެވެ. މިވަގުތު މިބަލި ޖެހިފައި ތިބި މީހުންގެ އަދަދު 2117 ގައި އުޅޭ އިރު، އެމީހުންގެ ތެރެއިން 207 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
