އޮބްލޫ ސިލެކްޓް ސަންގެލި ރިސޯޓުން ފެނިފައިވާ ކޮވިޑް ޕޮޒިޓިވް ކޭސްގެ އަދަދު 102 އަށް އަރައިފިއެވެ.
ހެލްތު އެމަޖެންސީ އޮޕަރޭޝަން ސެންޓާ (އެޗްއީއޯސީ) އިން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑރ. ފާތުމަތު ނަޒްލާ ރަފީގް ވިދާޅުވީ، ފަހުން ޕޮޒިޓިވް ވި މީހުންނާއެކު އޮބްލޫ ސިލެކްޓް ސަންގެލި ރިސޯޓުން ޕޮޒިޓިވް ވެފައިވާ މީހުންގެ އަދަދު 102 އަށް އަރާފައިވާ ކަމަށެވެ.
އެގޮތުން މި މަހުގެ 4 ވަނަ ދުވަހު އެ ރިސޯޓުން ވަނީ ޕޮޒިޓިވް އެއް ކޭސް ފެނިފައި ކަމަށާއި މި މަހުގެ 6 ވަނަ ދުވަހު ވެސް އިތުރު ތިން ކޭސް ފެނިފައި ވާ ކަމަށް ނަޒްލާ ވިދާޅުވިއެވެ.
އެ ރިސޯޓުން ޕޮޒިޓިވްވި މީހުންގެ އަދަދު 102 އަށް އަރާފައި ވާއިރު، މިދިޔަ މަހުގެ 3 ވަނަ ދުވަހު ބަލީގެ އަލާމާތްތައް ހުރެގެން އެ ރިސޯޓުން ޓެސްޓު ކުރި 3 މީހަކު ބައްޔަށް ވަނީ ޕޮޒިޓިވް ވެފައެވެ. އަދި މިދިޔަ މަހުގެ 11 ވަނަ ދުވަހުގެ ބަލީގެ އަލާމާތް ހުރެގެން ޓެސްޓު ކުރި 2 މީހަކު ވަނީ ބައްޔަށް ޕޮޒިޓިވް ވެފައެވެ.
އެ ކޭސްތަކާ ގުޅިގެން ނެގި ރެންޑަމް ސާމްޕަލް ތަކުން 27 މީހަކު މިދިޔަ މަހުގެ 13 ގައި ޕޮޒިޓިވް ވެފައި ވާއިރު މިދިޔަ މަހުގެ 14 ވަނަ ދުވަހު 10 މީހަކު ޕޮޒިޓިވް ވެފައި ވާ ކަމަށް އެޗްއީއޯސީން ބުނެފައި ވެއެވެ. މީގެ އިތުރުން މިދިޔަ މަހުގެ 22 ވަނަ ދުވަހު އެ ރިސޯޓުން 3 މީހަކު ޕޮޒިޓިވް ވެފައި ވެއެވެ. އަދި މިދިޔަ މަހުގެ 23 ގައި އެ ރިސޯޓުން 2 މީހަކު ވަނީ ޕޮޒިޓިވް ވެފައެވެ.
ރިސޯޓުތަކުން ޕޮޒިޓިވް ވާ މީހުންގެ އަދަދު އިތުރު ވަމުން ދާއިރު، ރެސިޑެންސް މޯލްޑިވްސްއިން 20 ކޭސްއެއް ވަނީ ފެނިފައެވެ. އަދި އަނަންތާރާ ކިހާވަށް ރިސޯޓުން ޕޮޒިޓިވް ވެފައިވާ މީހުންގެ އަދަދު 86 އަކަށް ވަނީ އަރާފައެވެ.
