ހަރުކަށި ފިކުރުގެ ޝިކާރައަކަށް ވި 17 ކުއްޖަކަށް ޖެންޑާ މިނިސްޓްރީން އެހީތެރިކަން ފޯރުކޮށްދީފިއެވެ.
"ދަ ޕްރެސް" އަށް މައުލޫމާތު ދެއްވަމުން ޖެންޑާ މިނިސްޓްރީގެ ޑިރެކްޓާ އޮފް ކޮމިއުނިކޭޝަން އިބްރާހިމް މުހައްމަދު ވިދާޅުވީ މެދުރާއްޖެތެރޭގެ ރަށެއްގައި ހަރުކަށި ފިކުރު ފެތުރި ކަމަށް ބެލެވޭ މައްސަލައެއްގައި އެ މިނިސްޓްރީން ވަނީ 17 ކުއްޖަކަށް އެހީތެރިކަން ފޯރުކޮށްދީފައި ކަމަށެވެ.
އެގޮތުން މިދިޔަ އަހަރުގެ ފަހު ކޮޅު އެކުދިންގެ ގޭގެއަށް ޒިޔާރަތްކޮށް ނަފްސާނީ ގޮތުން ދޭން ޖެހޭ އެހީތެރިކަން ފޯރުކޮށްދީ އެ ކުދިންގެ ހާލަތު ދެނެގަތުމުގެ މަސައްކަތް ކޮށްފައި ވާކަަމަށް އޭނާ ވިދާޅުވިއެވެ.
ޖެންޑާ މިނިސްޓްރީން އެހެން ބުނެފައި ވާއިރު، ތ. ތިމަރަފުށީގައި ހަރުކަށި ފިކުރުގެ ބަޔަކު އުމުރުން 14 އަހަރާއި 18 އަހަރާ ދެމެދުގެ ކުޑަކުދިން ހަރުކަށި ފިކުރަށް ލެންބުމުގެ މަސައްކަތްތަކެއް ވަނީ ކޮށްފައެވެ. އެކަން ހާމަ ކުރަމުން ފުލުހުން ބުނެފައި ވަނީ އެރަށުގައި ހަރުކަށި ފިކުރު ފަތުރަށް އުޅުނު މީހުން ދަތުރު ދިއުމުގެ ނަމުގައި ފަޅު ރަށްރަށަށް ގޮސް ތަމްރީނު ހެދުމާއި، ތިމަރަފުށީ ގޭގޭގައި ހަރުކަށި ފިކުރުގެ ކްލާސްތައް ހިންގުމާއި، ވަކި ޖަމާއަތް ހަދައިގެން ނަމާދު ކުރުން ފަދަ ކަންކަން ވެސް ކޮށްފައި ވާކަމަށެވެ.
ފުލުހުން ރ. ތިމަރަފުށީގައި ހިންގި އޮޕަރޭޝަނެއްގައި ދޯންޏަކާއި، 16 ގެއެއް ބަލާ ފާސްކޮށް، 8 މީހަކު ހައްޔަރު ވެސް ކުރިއެވެ.
އެމީހުންގެ މައްޗަށް ޓެރަރިޒަމްގެ ސީރިއަސް ތުހުމަތު ތަކެއް ކޮށްފައި ވާއިރު، އޭގެ ތެރޭގައި ހަރުކަށި ފިކުރު ފަތުރަން އުޅުމާއި، އައިއެސް ޖަމާއަތާ ގުޅިގެން ޓެރަރިޒަމް ހަމަލާ ދޭން އުޅުމާއި އަދި އެފަދަ އަމަލުތަކަށް ފަންޑު ކުރުމުގެ ތުހުމަތު ވެސް ހިމެނެއެވެ.
