ހުޅުމާލެ ދެވަނަ ފިޔަވަހީގައި ވަގުތީ މިސްކިތެއް އަޅާނެ ބަޔަކު ހޯދަން އިސްލާމިކް މިނިސްޓްރީން އިއުލާން ކޮށްފިއެވެ.
އިސްލާމިކް މިނިސްޓްރީން މިއަދު ކުރި އިއުލާނެއްގައި ވަނީ، ހުޅުމާލެ ދެވަނަ ފިޔަވަހީގައި ވަގުތީ މިސްކިތެއް އިމާރާތް ކުރުމުގެ މަސައްކަތުގައި ޝައުގުވެރިވާ ފަރާތްތަކުން، އެ މިނިސްޓްރީއަށް އަންދާސީ ހިސާބު ހުށަހެޅުމަށް އެދިފައެވެ. އެ މިނިސްޓްރީއަށް އަންދާސީ ހިސާބު ހުށަހެޅުމަށް މިނިސްޓްރީއަށް ދިއުމުގެ ކުރިން ރަޖިސްޓާ ކުރުމަށްފަހު މައުލޫމާތު ސާފު ކުރުމަށް ވެސް އިސްލާމިކް މިނިސްޓްރީން ވަނީ އެދިފައެވެ.
އިސްލާމިކް މިނިސްޓްރީން ބުނީ، މި ބިޑުގައި ބައިވެރިވުމަށް އެދޭ ފަރާތްތަކުން މިމަހު 11 ވަނަ ދުވަހުގެ މެންދުރު 2:00ގެ ކުރިން އެ މިނިސްޓްރީގެ މެއިލް މެދުވެރިކޮށް ރަޖިސްޓްރީ ވުމަށް އެދިފައެވެ. ރަޖިސްޓާ ކުރަން ފޮނުވާ މެއިލްގެ ސަބްޖެޓުގައި އިއުލާން ނަންބަރު ކޮންމެހެން ހިމަނަން ޖެހެއެވެ. އަދި މެއިލްގައި ކުންފުނީގެ ނަން، ގުޅޭނެ ފޯނު ނަންބަރު، އީމެއިލް އެޑްރެސް އަދި މެއިލް ފޮނުވާ މީހާގެ ނަން ވެސް ކޮންމެހެން ހިމަނަން ޖެހޭނެއެވެ.
އިސްލާމިކް މިނިސްޓްރީން ބުނީ، މި މަޝްރޫއާ ގުޅޭ މައުލޫމާތު ކަރުދާހެއް ބިޑަށް ރަޖިސްޓާ ކުރާ ހުރިހާ ފަރާތްތަކަށް މެއިލް މެދުވެރިކޮށް ލިބޭނެ ކަމަށެވެ.
މި މަޝްރޫއުގެ ޕްރީ ބިޑް މީޓިން އޮންނާނީ މި މަހު 14 ވަނަ ދުވަހުގެ މެންދުރު 1:00ގައި އިސްލާމިކް މިނިސްޓްރީގެ މީޓިން ރޫމް 1 ގައެވެ. މި މީޓިންގައި ބިޑާ ގުޅިގެން ސަމާލުކަން ދޭންވީ ކަންތައްތައް ހިއްސާ ކުރުމާއި، ބިޑަރުންގެ ސުވާލުތަކަށް ޖަވާބު ދިނުން އޮންނާނެ ކަމަށް އިސްލާމިކް މިނިސްޓްރީން ބުނެއެވެ.
އަންދާސީ ހިސާބު ހުށަހެޅުން އޮންނާނީ މިމަހު 21 ވަނަ ދުވަހުގެ މެންދުރު 1:00ގައި އިސްލާމިކް މިނިސްޓްރީގެ މީޓިން ރޫމް 1 ގައެވެ. އަންދާސީ ހިސާބު ހުށަހެޅުމަށް ރަޖިސްޓްރީ ނުކުރާ ފަރާތަކަށް އަންދާސީ ހިސާބު ހުށަހެޅުމުގެ ފުރުސަތެއް ނޯންނާނެ ކަމަށް އިސްލާމިކް މިނިސްޓްރީން ބުނެއެވެ.
މި ބިޑާ މެހޭ އިތުރު މައުލޫމާތު ބޭނުން ނަމަ މިމަހު 17 ވަނަ ދުވަުގެ ހެނދުނު 11:00ގެ ކުރިން މިނިސްޓްރީއަށް މެއިލް ކުރުމަށް އިސްލާމިކް މިނިސްޓްރީން އެދެއެވެ. ނުވަތަ 3020284، 3020276، 3020239 އަށް ގުޅުމުން މައުލޫމާތު ސާފު ކުރެވޭނެ ކަމަށް ވެސް އެ މިނިސްޓްރީން ބުނެއެވެ.
