އއ. ތޮއްޑޫ މޮނިޓަރިންގެ ހާލަތުގައި ބޭއްވުމަށް ފަހު އާންމު ހާލަތަށް ބަދަލު ކުރި ފަހުން އެ ރަށުގައި ފުރަބަންދުގައި ހުރި މީހަކު ކޮވިޑަށް ޕޮޒިޓިވް ވެއްޖެއެވެ.
އެ ރަށުގެ ސިއްހީ މަރުކަޒުން 'ދަ ޕްރެސް' އަށް މައުލޫމާތު ދެމުން ބުނީ، އެ ރަށް މޮނިޓަރިންގެ ހާލަތުން އާންމު ހާލަތަށް ބަދަލުކޮށްފައި ވަނީ ރޭގެ ވަގުތެއްގައި ކަމަށެވެ. ނަމަވެސް މިއަދު އެ ރަށުގައި ހޯމް ކަރަންޓީންގައި ހުރި މީހަކު ފުރަބަންދުން ދޫކޮށްލުމަށް ނެގުނު ސާމްޕަލް ޕޮޒިޓިވް ވެފައިވާ ކަމަށް ސިއްހީ މަރުކަޒުން ބުނެއެވެ.
މިއަދު ތޮއްޑޫ އިން ޕޮޒިޓިވްވި މީހާ އަކީ އުމުރުން 55 އަހަަަރުގެ ފިރިހެނެއް ކަމަށާއި އޭނާ އަކީ ދާއިމީ ބައްޔަކަށް ބޭސް ފަރުވާ ކުރަމުންދާ މީހެއް ކަމުން އެއީ ހައި ރިސްކް ކެޓަގަރީގައި ހިމެނޭ މީހެއް ކަމަށް އެ ރަށު ސިއްހީ މަރުކަޒުން ބުނެއެވެ. އަދި އޭނާ ފުރަބަންދުގައި ހުރި އިރު އޭނާގެ ޑައިރެކްޓް ކޮންޓެކްޓެއްގެ ގޮތުގައި އޭނާގެ އަންހެނުން ހިމެނޭ ކަމަށާއި މީހަރު އެމީހާގެ ސާމްޕަލް ނެގުމުގެ މަސައްކަތް ކުރިއަށް ދާ ކަމަށް ވެސް ސިއްހީ މަރުކަޒުން ބުނެއެވެ. ދެމަފިރިންގެ ތެރެއިން މާލެއަށް ގޮސް ރަށަށް އައީ ހަމަ އެކަނި ފިރިހެން މީހާ ކަމަށާއި އަންހެން މީހާ ހުރީ ރަށުގައި ކަމަށް ވެސް އެ ފަރާތުން މައުލޫމާތު ދެއެވެ.
ދާދި ފަހުން ތޮއްޑޫ މޮނިޓަރިންގެ ހާލަަތަށް ބަދަލު ކޮށްފައި ވަނީ އެ ރަށުން މާލެއަށް އައި މީހަކު ކޮވިޑަށް ޕޮޒިޓިވް ވުމާ ގުޅިގެންނެވެ. މޮނިޓަރިންގެ ހާލަތުން އެ ރަށް އާންމު ހާލަތަށް ބަދަލު ކޮށްފައި ވާ އިރު، މާލެއިން ޕޮޒިޓިވް ވި ކޭސް އާ ގުޅިގެން އެރަށުން 60 ރެންޑަމް ސާމްޕަލް ވަނީ ނަގާފައެވެ. އަދި އެ ސާމްޕަލް ތަކުގެ ނަތީޖާ ނެގެޓިވް ކަމަށް ވެސް އެ ރަށު ސިއްހީ މަރުކަޒުން ބުނެއެވެ.
