މޯލްޑިވްސް ޕޮލިސް ސާވިސްގެ އިންފޮމޭޝަން މެނޭޖްމަންޓު ސިސްޓަމާއި އިންޓަޕޯލްގެ ރިއަލްޓައިމް ކްރިމިނަލް އިންފޮމޭޝަން ޑޭޓާ ބޭސްތަކާއި ގުޅާލާ މާލެ އާއި އަތޮޅު ތެރޭގައި މަސައްކަތް ކުރާ ފުލުހުންނަށް އިންޓަޕޯލްގެ ޓޭޑާ ބޭސްތައް ބެލޭނެ އިންތިޒާމް ހަމަޖައްސައިފިއެވެ.
ފުލުހުން ބުނީ، ފުލުހުންގެ ސިސްޓަމުން އިންޓަޕޯލްގެ ރިއަލްޓައިމް ކްރިމިނަލް އިންފޮމޭޝަން ޑޭޓާ ބޭސް ބެލޭ ގޮތް ހަމަޖެހުމުން ފްރަންޓް ލައިންގައި މަސައްކަތް ކުރާ މުވައްޒަފުންނަށް އިންޓަޕޯލްގެ ޑޭޓާ ބޭސްގައި ހިމެނިފައިވާ މީހުންގެ މައުލޫމާތު ވަގުތުން ދެނެގަނެވި އެ މީހުންނާ މެދު އަޅަން ޖެހޭ ފިޔަވަޅުތައް އެޅުމަށް ފަސޭހަވެގެން ދާނެ ކަމަށެވެ. ހަމައެއާއެކު ބޭރު ގައުމު ތަކުގައި ކުށުގެ އަމަލުތައް ހިންގައި އެ ގައުމު ތަކުން ފިލައިގެން އުޅޭ މީހުން ދެނެގަނެ އެމީހުންނާ ގުޅޭ މައުލޫމާތު އެ ގައުމުތަކަށް ހިއްސާ ކުރުމުގެ ފުރުސަތު ވެސް ފަހިވެގެން ދާނެ ކަމަށެވެ.
ރާއްޖޭގައި މަސައްކަތް ކުރާ ބިދޭސީގެ އާބާދީ އިތުރު ވުމާއި، ލޯކަލް ޓޫރިޒަމް ރާއްޖެއަށް ފުޅާވަމުންދާ މި ދަނޑިވަޅުގައި ރާއްޖޭގެ ރަށްތަކުގެ ސަލާމަތާއި ރައްކާތެރިކަން ކަށަވަރު ކުރުމަށް އެޅި މުހިންމު ފިޔަވަޅެއްގެ ގޮތުގައި ފުލުހުން ސިފަކުރެއެވެ. އަދި ވަކިން ހާއްސަ ގޮތެއްގައި ޓެރަރިޒަމްގެ ނުރައްކަލުން ސަލާމަތް ވުމަށް ކުރެވޭ މަސައްކަތް ތަކުގައި މިފަދަ މައުލޫމާތު ފަސޭހައިން އެނގެން ހުރުމުން ފުލުހުންގެ މަސައްކަތްތަކަށް އިތުރު ކުރިއެރުމާ ފަސޭހަތަކެއް ލިބިގެން ދާނެ ކަމަށް ފުލުހުން ބުނެއެވެ.
އިންޓަޕޯލުން އަބަދުވެސް މަސައްކަތް ކުރަމުން އަންނަނީ ބައިނަލްއަގްވާމީ ގޮތުން ފުލުހުންގެ މަސައްކަތްތައް ގުޅާލައި، ގައުމުތަކުގެ މެދުގައި ހިނގާ ކުށްތައް ހުއްޓުވުމަށް ގުޅިގެން މަސައްކަތް ކުރުން ކަން ފުލުހުން ފާހަގަ ކުރެއެވެ. އެގޮތުން އިންޓަޕޯލް ޑޭޓާ ބޭސް އާއި ފުލުހުންގެ އިންފޮމޭޝަން ސިސްޓަމް ގުޅާލުމުގެ ފިޔަވަޅާ އެކު ކުރިއަށް އޮތް ތަނުގައި ދިވެހި ފުލުހުންނާއި ބައިނަލްއަގްވާމީ ފުލުހުންގެ އެހެން އިދާރާތަކާ މެދު މައުލޫމާތު ބަދަލު ކުރެވޭނެ އިތުރު ފަސޭހަ ނިޒާމެއް ގާއިމު ކޮށްފައިވާ ކަމަށް ފުލުހުން ބުނެއެވެ.
