ޅ. ހިންނަވަރާއި ށ. ކަނޑިތީމުގައި ހިންގި އޮޕަރޭޝަންތަކެއްގައި މަސްތުވާތަކެއްޗާއެކު ނުވަ މީހަކު ހައްޔަރުކޮށްފިއެވެ.
ފުލުހުން ބުނީ އެ އޮޕަރޭޝަންތަކުގެ ތެރެއިން ޅ. ހިންނަވަރުގައި ތިން އޮޕަރޭޝަނެއް ހިންގާފައިވާ ކަމަށާއި މި އޮޕަރޭޝަންތަކުގައި އަށް މީހަކު ހައްޔަރުކުރި ކަމަށެވެ.
އެގޮތުން ހިންވަރުގައި ހިންގި އޮޕަރޭޝަންތަކުގެ ތެރެއިން ފުރަތަމަ އޮޕަރޭޝަނަކީ މާލެއިން ފުރައިގެން ހިންނަވަރަށް އަންނަ ބޯޓަކުން މަސްތުވާތަކެތި ގެންނަކަމަށް ލިބުނު މައުލޫމާތަކާ ގުޅިގެން ޖެނުއަރީ 22 ވަނަ ދުވަހު ހިންގި އޮޕަރޭޝަނެއް ކަމަށް ފުލުހުން ވަނީ ބުނެފައެވެ.
މި އޮޕަރޭޝަނުގައި އެބޯޓު ހިންނަވަރަށް ކައިރިކުރުމުން އެބޯޓުގައި ހުރި ފޮށިގަނޑެއް ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ފިލްމު ހުސްކުރި ދަޅެއް ފެނިފައިވާ ކަމަށާއި ނަމަވެސް މިމައްސަލާގައި މީހަކު ހައްޔަރުކޮށްފައި ނުވާ ކަމަށް ފުލުހުން ބުނެއެވެ.
ފުލުހުން ބުނީ ހިންނަވަރުގައި ހިންގި ދެވަނަ އޮޕަރޭޝަނަކީ ޖެނުއަރީ 26 ވަނަ ދުވަހު ހިންގި އޮޕަރޭޝަނެއް ކަމަށާއި މި އޮޕަރޭޝަނުގައި މަސްތުވާތަކެތި ބޭނުންކޮށް އެތަކެތި ބަންދު ކުރުމުގެ މަސައްކަތް ކުރަމުން ދިޔަ ތަނެއް ބަލައިފާސްކޮށްފައިވާއިރު އެތަނުން މަސްތުވާތަކެތިކަމަށް ޝައްކުކުރެވޭ އެއްޗެއް ހުރި 19 ރަބަރު ޕެކެޓް ފެނިފައިވާ ކަމަށެވެ.
މި އޮޕަރޭޝަނުގައި 35 އަހަރުގެ އަންހެނަކާއި 33 އަހަރުގެ އަންހެނަކާއި 28 އަހަރުގެ ފިރިހެނަކާއި 31 އަހަރުގެ ފިރިހެނެއް ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ މި އޮޕަރޭޝަނުގައި ހައްޔަރުކޮށްފައިވާ މީހުންގެ ކުޑަކަމުދާތަކެތި ޓެސްޓްކުރުމުން މަސްތުވާތަކެއްޗަށް ޕޮޒިޓިވްވެފައިވާ ކަމަށާއި އަދި އެމީހުންގެ ބަންދާމެދު ގޮތެއް ނިންމުމަށް ހިންނަވަރު މެޖިސްޓްރޭޓް ކޯޓަށް ހާޒިރުކުރުމުން އަށް ދުވަހުގެ މުއްދަތެއް ދީފައިވާ ކަމަށެވެ.
ޖެނުވަރީ 27 ވަނަ ދުވަހު ހިންނަވަރުގައި ހިނގި އޮޕަރޭޝަނަކީ މަސްތުވާތަކެތި ގެންގުޅޭކަމަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއް ކަމަށް ފުލުހުން ވަނީ ބުނެފައެވެ. ފުލުހުން ބުނީ މި އޮޕަރޭޝަނުގައި އެރަށު ބަނދަރު ސަރަހައްދުން ތިން މީހަކު ހުއްޓުވާ ބަލައި ފާސްކުރި އިރު އެމީހުން ތިބި ތަނުގެ ބިންމަތިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 17 ޕެކެޓް ފެނިފައިވާ ކަމަށެވެ.
މި އޮޕަރޭޝަނުގައި ހައްޔަރުކޮށްފައިވަނީ 37 އަހަރުގެ ފިރިހެނަކާއި 23 އަހަރުގެ ފިރިހެނަކާއި 33 އަހަރުގެ ފިރިހެނެއް ކަމަށާއި މި މީހުންގެ ބަންދާމެދު ގޮތެއް ނިންމުމަށް ނައިފަރު މެޖިސްޓްރޭޓް ކޯޓަށް ހާޒިރުކުރުމުން ވަނީ 37 އަހަރުގެ މީހާގެ ބަންދަށް ހަ ދުވަސް، 23 އަހަރުގެ މިހާއާއި 33 އަހަރުގެ މީހާއަށް ފަސް ދުވަހުގެ މުއްދަތެއް ދީފައިވާ ކަމަށް ފުލުހުންވަނީ ބުނެފައެވެ.
ފުލުހުން ބުނީ ކަނޑިތީމުގައި ހިންގި އޮޕަރޭޝަނަކީ ޖެނުއަރީ 29 ވަނަ ދުވަހު އެރަށުގައި ކުރިއަށް ގެންދިޔަ އޮޕަރޭޝަނެއް ކަމަށެވެ. މި އޮޕަރޭޝަނުގައި އެރަށު ބަނދަރު ސަރަހައްދުން 29 އަހަރުގެ ފިރިހެނަކު ހައްޔަރުކޮށްފައިވާއިރު އެމީހާ ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވާ ކަމަށް ފުލުހުން ވަނި ބުނެފައެވެ.
