ކޮވިޑް-19 ހަލުވި ކަމާއެކު ފެތުރެމުން ދާތީ، ރައްކާތެރި ކަމުގެ ފިޔަވަޅެއްގެ ގޮތުން އައިޖީއެމްއެޗްގެ ބައެއް ހިދުމަތްތަކަށް ބަދަލު ގެނެސްފިއެވެ.
އައިޖީއެމްއެޗްގެ ހިދުމަތްތަކަށް ގެނެސްފައިވާ ބަދަލުތަކާ އެއްގޮތަށް މިހާރު އެ ހޮސްޕިޓަލުގެ ޑިޕާޓްމަންޓްތަކުން އަމަލު ކުރަން ފަށާފައިވާ ކަން އެ ހޮސްޕިޓަލުން ވަނީ 'ދަ ޕްރެސް' އަށް ކަށަވަރު ކޮށްދީފައެވެ.
އައިޖީއެމްއެޗެގް ހިދުމަތްތަކަށް ގެނަިއ ބަދަލުތައް:
- އައިޖީއެމްއެޗާއި ދަރުމަވަންތަ ހޮސްޕިޓަލަށް ވަންނަ ފަރާތްތައް ހުމާއި ރޯގާ ފަދަ ކޮވިޑްގެ އަލާމާތްތަކަށް ސްކްރީން ކުރުން
- ހުމާއި ރޯގާ ފަދަ ކޮވިޑްގެ އަލާމާތްތައް ހުރިނަމަ ފްލޫ ކްލިނިކަށް ދިއުމަށް އިރުޝާދު ދިނުން
- ދުރާލާ ރާވައިގެން ކުރިއަށް ގެންދިއުމަށް ހަމަޖެހިފައިވާ ރޫޓީން އޮޕަރޭޝަންތައް މަދު ކުރުން
- ގިނަ އޯޕީޑީތަކުގައި ބަލިމީހުން ބެލުން ހެނދުނު 8:00 އިން މެންދުރު 2:00 އާ ހަމައަށް ކުރިއަށް ގެންދިއުން
- އޯޕީޑީ ވެއިޓިން އޭރިއާގައި އެއް ވަގުތެއްގައި މަޑުކުރާ ބަލި މީހުން މަދު ކުރުމުގެ ގޮތުން އެޕޮއިންޓްމަންޓްތައް އެކި ގަޑިތަކަށް ބަހާލައިގެން ބަލި މީހުން ގެނައުން
އައިޖީއެމްއެޗްގެ ހިދުމަތްތަކަށް މިއަދު ބަދަލު ގެނެސްފައި ވާއިރު، އިއްޔެ ވަނީ އޭޑީކޭގެ ހިދުމަތްތަކަށް ވެސް ބަދަލު ގެނެސްފައެވެ.
މާލެ ސަރަހައްދުގެ ހޮސްޕިޓަލްތަކުން ދެމުން ގެންދާ ހިދުމަތްތަކަށް ބަދަލު ގެންނަމުން ދަނީ ރާއްޖޭގެ ކޮވިޑްގެ ހާލަތު ގޯސްވަމުން އަންނާތީއެވެ. އެގޮތުން މާލެ ސަރަހައްދުން ޕޮޒިޓިވްވާ މީހުންގެ އަދަދު ވެސް ބޮޑުތަނުން ގިނަ ވެފައިވާއިރު، ފާއިތުވި ހަފްތާގައި ޕޮޒިޓިވް ކޭސްތައް އުޅުނީ 100 އިން މަތީގައެވެ. އެކަމާ ހެދި މާލެ ސަރަހައްދުގައި ވަނީ ކާފިއު އިއުލާންކޮށް، ރަސްމިއްޔާތުތަކާއި ޕާޓީތައް އަދި އެހެނިހެން އެއްވުންތައް ބޭއްވުން މަނާކޮށްފައެވެ. ހަމައެއާއެކު މާލެއިން އަތޮޅުތެރެއަށް ދަތުރުކުރާ އަދި ރާއްޖެއިން ބޭރުގައި ތިބުމަށްފަހު ރާއްޖެ އަންނަ މީހުން ވެސް ކަރަންޓީން ވާން ޖެހޭ ގޮތަށް އުސޫލު ވަނީ ބަދަލު ކޮށްފައެވެ.
