ކޮވިޑާ ގުޅިގެން ހއ ދިއްދޫ މޮނިޓަރިންގެ ހާލަަތަށް މިއަދު ބަދަލު ކޮށްފައިވާ ކަމަށް އެ ރަށު ކައުންސިލުން އާންމު ކޮށްފައި ވާ އިރު އެއީ އޮޅުމެއް ކަމަށް އެ ކައުންސިލުން ބުނެއެވެ.
އެ ރަށް މޮނިޓަރިންގެ ހާލަަތަށް މިއަދުން ފެށިގެން ބަދަލުކޮށްފައި ވާ ކަމަށް ބުނެ އެޗްޕީއޭއިން ފޮނުވާފައިވާ ލިޔުން އެ ކައުންސިލްގެ އެފްބީ ޕޭޖުގައި ކުރިން ވަނީ ޕޯސްޓް ކޮށްފައެވެ. ނަމަވެސް އެއީ އޮޅުމަކުން ކުރެވުނު ކަމެއް ކަމަށް އެޗްޕީއޭއިން ބުނެފައި ވަތީ މިހާރު އެ ލިޔުން ނަގާފައިވާ ކަމަށް އެ ކައުންސިލުން ބުނެއެވެ.
މިހާރު ރާއްޖޭގައި ކޭސްތައް އިތުރުވަމުން އަންނަ އިރު މ. ކޮޅުފުށި އަދި އއ. ތޮއްޑޫ ވަނީ މޮނިޓަރިންގެ ހާލަތަށް ބަދަލު ކޮށްފައެވެ.
މި ދެ ރަށް ވެސް މޮނިޓަރިންގެ ހާލަަތަށް ބަދަލުކޮށްފައި ވަނީ އެ ދެ ރަށުން ވެސް މާލެއަށް އައި މީހަކު ކޮވިޑަށް ޕޮޒިޓިވް ވުމުންނެވެ. ކޮޅުފުށި ކޭސް އާ ގުޅިގެން މި މަހުގެ 5 ވަނަ ދުވަހުގެ ކުރިން އެރަށުން އެހެން ރަށަކަށް ގޮސްފައިވާ ފަރާތެއް ވާނަމަ ކަރަންޓީން ވެ ކޮވިޑް ޓެސްޓު ހެދުމަށް އެޗްޕީއޭ އިން ވަނީ އިލްތިމާސް ކޮށްފައެވެ.
މީގެ އިތުރުން ގއ. ދެއްވަދޫ އާއި ދާންދޫ އަދިވެސް އޮތީ މޮނިޓަރިންގެ ހާލަތުގައެވެ.
ކޭސްތައް އިތުރުވުމާ ގުޅިގެން ރައްކާތެރިކަމުގެ ފިޔަވަޅުތައް ހަރުކަށި ކުރުމުގެ ގޮތުން މި މަހުގެ 27 އިން ފެށިގެން ވަނީ މާލޭ ސަރަހައްދުގައި ކާފިއު އަނެއްކާ ވެސް އިއުލާން ކޮށްފައެވެ. އެ ގޮތުން ރޭގަނޑު 12:00 އިން ފެށިގެން ފަތިހު 4:00 އާ ދެމެދު ކާފިއު ވަގުތު ގޮތުގައި ވަނީ އިއުލާން ކޮށްފައެވެ. ހަމައެއާއެކު ރާއްޖެއިން ބޭރުން އަންނަ މީހުންގެ ތެރެއިން ފަތުރުވެރިން ފިޔަވާ އެންމެން ކަރަންޓީން ވާން ޖެހޭ ގޮތަށް ވެސް ވަނީ ހަމަޖައްސާފައެވެ.
