ވ. ކެޔޮދޫގައި ފުލުހުންގެ ހިދުމަތް ފަށައި އެރަށުގައި ގާއިމްކުރި ޕޮލިސް ޕޯސްޓް ރަސްމީކޮށް ހުޅުވައިފިއެވެ.
މިކަމަށްޓަކައި ކެޔޮދޫގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ފޮރިން މިނިސްޓަރު އަބްދުﷲ ޝާހިދުއެވެ. މި ރަސްމިއްޔާތުގައި ޕޮލިސް ޕޯސްޓް ހުޅުއްވާ ދެއްވީ ހޯމް މިނިސްޓަރު އިމްރާން އަބްދުﷲ އާއި ކޮމިޝަނާ އޮފް ޕޮލިސް މުހައްމަދު ހަމީދުއެވެ.
ޕޮލިސް ޕޯސްޓް ހުޅުއްވާ ދެއްވުމަށްފަހު ޕޮލިސް ޕޯސްޓްގައި ދިވެހިރާއްޖޭގެ ދިދަ ނަންގަވާދެއްވީ މިނިސްޓަރު ޝާހިދުއެވެ. އަދި ފުލުހުންގެ ދިދަ ނަންގަވާ ދެއްވީ ސީޕީ ހަމީދުއެވެ.
މި ރަސްމިއްޔާތުގައި މިނިސްޓަރު ޝާހިދު ދެއްކެވި ވާހަކަގައި ފުލުހުން ކެޔޮދޫގައި ފަށާ ހިދުމަތް ކާމިޔާބު ވާނީ ރައްޔިތުން އެ ހިދުމަތް ބަލައިގަތް މިންވަރުން ކަމަށް ވިދާޅުވިއެވެ.
އަދި ފުލުހުންގެ ހިދުމަތް ކާމިޔާބު ކުރުމަށްޓަކައި ފުލުހުންނާ ގުޅިގެން މަސައްކަތް ކުރުމަށް މިނިސްޓަރު އެދިވަޑައިގެންނެވިއެވެ.
ފުލުހުންނަކީ ދިމާވާ ކޮންމެ ދަތި ކަމެއްގައި ނުވަތަ ހާލަތެއްގައި އަމިއްލަ ނަފްސާއި ފުރާނައަށް ބެލުމެއް ނެތި ރައްޔިތުންގެ ހައްގުގައި ނުކުތުމަށް ހުވާކޮށްގެން ތިބެ އެކަން ސާބިތުކޮށްދީފައި ވާ ބައެއް ކަމަށާއި އެއީ ފުލުހުންނަށް އިހުތިރާން ކުރަން ޖެހޭ ކަމެއް ކަމަށް ޝާހިދު ވިދާޅުވިއެވެ. އެގޮތުން މިހާރު މިއޮތް ކޮވިޑްގެ ހާލަތުގައި ވެސް ފުލުހުން، އެންމެ އިންޗި އެއްވެސް ފަހަށް ނުޖެހޭ ކަމަށާއި ފުލުހުން ވަމުން ދާ ގުރުބާނީ އަބަދު ވެސް ހަނދާން ކުރަންވާނެ ކަމަށް ޝާހިދު ވިދާޅުވިއެވެ.
މިނިސްޓަރު އިމްރާން ދެއްކެވި ވާހަކަގައި ފުލުހުންގެ ހިދުމަތް ފެށުމަކީ ރައްޔިތުން އުއްމީދު ކުރާ ހިދުމަތެއް ލިބިގެން ދިއުން ކަމަށާއި މިއީ ބޮޑު ޒިންމާއެއް އަދި މުހިންމު ކަމެއް ކަމަށް ވިދާޅުވިއެވެ. އަދި ކުރީގެ ދުވަސްތަކާއި މިއަދު ރަށްރަށުގެ ހާލަތާއި ކުށުގެ ވެށި ވަރަށް ބޮޑަށް ތަފާތުވެފައިވާ ކަމަށާއި އެހެންކަމުން ކޮންމެ ރަށެއްގައި ފުލުހުން ގާއިމްވެ ތިބެ ރައްޔިތުންނާ ގާތުން ހިދުމަތް ދިނުމަކީ ރައްޔިތުންގެ އަމާންކަމާއި ރައްކާތެރިކަމަށް ކޮންމެހެން ބޭނުންވާ ކަމެއް ކަމަށް ސަރުކާރުން ގަބޫލުކޮށް، އެސިޔާސަތުގެ ދަށުން ފުލުހުންގެ ހިދުމަތް ފުޅާކުރުމަށް މަސައްކަތް ތަކެއް ކުރައްވަމުން ގެންދަވާ ކަމަށް އިމްރާން ވިދާޅުވިއެވެ.
މި ރަސްމިއްޔާތުގައި ސީޕީ ދެއްކެވި ވާހަކަގައި ފުލުހުންގެ ފަސް އަހަރުގެ ސްޓްރެޓީޖިކް ޕްލޭން އަމާޒު ކުރެވިފާ ވަނީ ފުލުހުން ދޭ ހިދުމަތް އަލުން ތަރުތީބުކޮށް، ޑިމޮކްރެޓިކް ވެއްޓަކަށް އެކަށޭނަ އަދި ތަރައްގީ ވެފައިވާ ފުލުހުންގެ ހިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާ އަކަށް ފުލުހުންގެ ހިދުމަތް ބަދަލު ކުރުމަށް ކަމަށް ވިދާޅުވިއެވެ.
އޭގެ އިތުރުން ފުލުހުންގެ ސްޓްރެޓީޖިކް ޕްލޭންގައި ހިމެނޭ ލަނޑުދަނޑިތަކުގެ ތެރޭގައި ލޯކަލް ޕޮލިސިން ކަނޑައަޅާފައި ވަނީ އަތޮޅު ތެރޭގައި ދެވޭ ހިދުމަތަށް ވަރަށް ބޮޑެތި ބަދަލުތަކެއް ގެނައުމުގެ މަގުސަދުގައި ކަމަށާއި ކެޔޮދޫގައި ހުޅުވި ޕޮލިސް ޕޯސްޓަކީ އެ އަމާޒަށް ވާސިލް ވުމަށްޓަކައި ކުރިއަށް އެޅުނު ފިޔަވަޅެއް ކަމަށް ސީޕީ ވިދާޅުވިއެވެ.
ހަމައެއާއެކު ފުލުހުންގެ ހިދުމަތަށް ގެނެވޭ ބަދަލުތަކުގެ ތެރެއިން އިންގިލާބީ އެއް ބަދަލަކީ އަވަށްޓެރި ފުލުހުންގެ ހިދުމަތް ކަމަށާއި މި ހިދުމަތް މާލެ، ވިލިމާލެ އަދި ހުޅުމާލޭގެ އިތުރުން އައްޑޫ ސިޓީ އާއި ފުވައްމުލަކު ސިޓީ އާއި ގއ. އަތޮޅު އަދި ގދ. އަތޮޅުގައި ފެށިފައިވާ ކަމަށް ސީޕީ ވިދާޅުވިއެވެ.
