ރައްޔިތުން މަޖިލީހުގެ 2021 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާއަށް ދައުވަތު ދީފައިވާ މީހުންގެ އަދަދު މަދުކޮށްފިއެވެ.
މި ޖަލްސާ ބޭއްވުމަށް ހަމަޖެހިފައި ވަނީ އަންނަ މަހުގެ 4 ވަނަ ދުވަހުއެވެ. ރައްޔިތުން މަޖިލީހުގެ އިދާރާއިން ބުނީ، އެ ޖަލްސާއަށް ދައުވަތު ދީފައިވާ މީހުން މަދުކުރަން ޖެހުނީ ހެލްތު ޕްރޮޓެކްޝަން އެޖެންސީން މި މަހުގެ 27 ވަނަ ދުވަހު ނެރުނު ނަންބަރު 20211 އިއުލާނާ ގުޅިގެން ކަމަށެވެ.
މަޖިލިސް އިދާރާއިން ބުނީ، ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށް ހަމަޖެހިފައިވާ ރައްޔިތުންގެ މަޖިލީހުގެ 2021 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާއަށް ދައުވަތު އެރުވުނު ބޭފުޅުންގެ އަދަދު މަދުކުރަން ޖެހުމާއެކު، މިހާރު ދައުވަތު އެރުވިފައި ވަނީ ވަޒީރުންގެ މަޖިލީހުގެ މެންބަރުންނަށާއި، ރާއްޖޭގައި ތިއްބަވާ ބޭރު ދައުލަތްތަކުގެ ސަފީރުން އަދި ހައިކޮމިޝަނަރުންނަށް ކަމަށެވެ. އެހެންކަމުން، މި ބޭފުޅުން ފިޔަވައި އެހެން ބޭފުޅުންނަށް އެރުވިފައިވާ ދައުވަތު މިހާރު ކެންސަލް ކުރެވިފައިވާ ކަމަށް މަޖިލިސް އިދާރާއިން ބުނެއެވެ.
މި މަހުގެ 27 ވަނަ ދުވަހު އެޗްޕީއޭއިން އިއުލާން ނެރެފައި ވަނީ ރާއްޖޭގައި މިހާރު ކޮވިޑް ކޭސްތައް އިތުރުވަމުން އަންނާތީ ރައްކާތެރިވުމުގެ ގޮތުން އަލާފައިވާ ފިޔަވަޅުތައް އިތުރަށް ހަރުކަށި ކުރުމަށެވެ. އެ ގޮތުން މާލެއާއި، ހުޅުމާލެއާއި، ވިލިމާލޭގައި، ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ހުއްޓާލުމަށް އެޗްޕީއޭއިން އަންގާފައި ވެއެވެ. އަދި ރޭގަނޑު 12:00 އިން ފެށިގެން ފަތިހު 4:00 އަށް، މާލެއާއި، ހުޅުމާލެއާއި، ވިލިމާލޭގައި، އެއްގަމު އުޅަނދު ފަހަރު ދުއްވުމާއި، މަގު މައްޗާއި އާންމު ތަންތަނަށް މީހުން ނުކުތުން ވެސް ވަނީ މަނާކޮށްފައެވެ.
މީގެ އިތުރުން މާލެއާއި، ހުޅުމާލެއާއި، ވިލިމާލެއިން ރާއްޖޭގެ އެހެނިހެން ރަށްރަށަށް ދަތުރުކުރާ ފަރާތްތައް ކަރަންޓީނު ކުރުމާއި މާދަމާއިން ފެށިގެން ފަތުރުވެރިން ފިޔަވައި، ރާއްޖެއިން ބޭރުން އަންނަ ފަރާތްތައް 10 ދުވަހުގެ މުއްދަތަށް ކަރަންޓީނު ކުރުން ވެސް ހިމެނެއެވެ.
