މަޖިލީހުގެ ސާޖެންޓް އެޓް އާމްސް، މުހައްމަދު ހަލީމް ސަސްޕެންޑް ކޮށްފިއެވެ.
މިކަން މަޖިލީހުގެ ކޮމިއުނިކޭޝަން ޑިރެކްޓަރު ހަސަން ޒިޔާއު ވަނީ 'ދަ ޕްރެސް' އަށް ކަށަވަރު ކޮށްދެއްވާފައެވެ. ސާޖެންޓް އެޓް އާމްސް ސަސްޕެންޑް ކޮށްފައި ވަނީ ކީއްވެތޯ އެހުމުން ޒިޔާއު ވިދާޅުވީ، އެއީ އޭނާގެ މައްސަލައެއް މަޖިލީހުން ބަލަމުން ގެންދާތީ ކަމަށެވެ.
ނަމަވެސް މިކަމުގެ އެއްވެސް އިތުރު ތަފްސީލެއް ޒިޔާއު ހާމަ ކުރައްވާފައެއް ނުވެއެވެ.
ސާޖެންޓް އެޓް އާމްސް ސަސްޕެންޑް ކޮށްފައި ވާއިރު، މިދިޔަ ނޮވެމްބަރު މަހު ވަނީ މަޖިލިސް "ބަގް" ކުރަން އުޅުނު ކަމަށް ބުނާ މައްސަލައެއް ފެންމަތިވެފައެވެ. އެގޮތުން، ބަގް ކުރަން އާލާތްތަކެއް ހަރުކުރަން އުޅުނީ މަޖިލީހުގެ ކޮމިޓީ ކޮޓަރިއަކާއި، ރައީސް އަދި ނައިބު ރައީސްގެ ކޮޓަރިކޮޅުގައެވެ. މި މައްސަލަ ފެންމަތިވެފައި ވަނީ މަޖިލީހުގައި މަސައްކަތްކުރާ ސެކިއުރިޓީ ސްޓާފުންނާއި ފުލުސް އޮފީހުގައި މަސައްކަތްކުރާ ސްޓާފަކާ ވާހަކަ ދެކެވި، މަޖިލީހުގެ ސެކިޔުރިޓީ ސްޓާފަކު އެކަން ސާޖަންޓް އޮފް އާމްސްގެ ސަމާލު ކަމަށް ގެނައުމުންނެވެ. އެ މައްސަލަ އިތުރަށް ބެލުމަށް މަޖިލީހުގެ ރައީސް، ރައީސް މުހައްމަދު ނަޝީދު ވަނީ ސާޖެންޓް އެޓް އާމްސް އަށް އަންގަވާފައެވެ.
މަޖިލީހުގެ ސާޖެންޓް އެޓް އާމްސްގެ މަގާމަށް ހަލީމް ފުރަތަމަ އައްޔަންކުރެއްވީ އޮކްޓޫބަރު 31، 2013 ވަނަ ދުވަހެވެ އެ މަގަމަށް ވަޑައިގެންނެވުމުގެ ކުރިން އޭނާ ވަނީ ގިނަ ދުވަހު އެމްއެމްޑީއެފަށް ހިދުމަތް ކުރައްވާފައެވެ.
ސާޖެންޓް އެޓް އާމްސް އަކީ ރައްޔިތުންގެ މަޖިލީހުގެ ރައީސް ކުރައްވާ އަމުރުތަކާއި މަޖިލީހުން ކުރާ އަމުރުތައް ތަންފީޒުކޮށް މަޖިލީހުގެ ގަވާއިދު ހިފެހެއްޓުމުގެ ޒިންމާ އުފުލާ ފަރާތެވެ.
