މަސްތުވާތަކެތި ބޭނުންކުރާ މީހުންގެ ތެރެއިން ފަރުވާ ބޭނުންވާ ތިން މީހަކު ފަރުކޮޅުފުށީގައި ގާއިމު ކޮށްފައިވާ ވަގުތީ ޑިޓޮކްސިފިކޭޝަން ސެންޓަރަށް ބަދަލުކޮށްފިއެވެ.
ފުލުހުން ނެރުނު ބަޔާނެއްގައި ބުނީ ބޯހިޔާވަހި ކަމަށް ބޭނުން ޖެހިފައި ވާ އަދި މަސްތުވާތަކެތި ބޭނުންކުރާ މީހުންގެ ތެރެއިން ފަރުވާ ބޭނުންވާ ފަރާތްތަކެއް މިއަދު ފާހަގަ ވެފައި ވާ ކަަމަށެވެ. އެމީހުން ދިރިއުޅެނީ ކުރިން މެޓްރޯ ކެފޭ ހިންގި އިމާރާތުގައި ކަމަށް މައުލޫމާތު ލިބުމާ ގުޅިގެން ޖެންޑާ މިނިސްޓްރީއާއި ޕޮލިހުން އެ ތަނަށް ދިޔައީ މިއަދުގެ ހަވީރުގެ ވަގުތެއްގައި ކަމަށެވެ.
އެގޮތުން ފަރުވާ ބޭނުންވާ ތިން މީހަކު ނޭޝަނަލް ޑްރަގް އޭޖެންސީގެ ހަވާލުގައި ފަރުކޮޅުފުށީގައި ގާއިމު ކޮށްފައިވާ ވަގުތީ ޑިޓޮކްސިފިކޭޝަން ސެންޓަރަށް ބަދަލުކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ މިހާރު އިމާރާތް ސާފުކުރުމުގެ މަސައްކަތް ކުރަމުން ދާ ކަމަށާއި އެކަމުގައި ވޭސްޓް މެނޭޖްމަންޓް ކޯޕަރޭޝަންގެ ފަރާތުން އެހީތެރިކަން ދެމުންދާ ކަމަށެވެ.
ފަރުކޮޅުފުށީގައި ވަގުތީ ޑިޓޮކްސިފިކޭޝަން ސެންޓަރެއް ގާއިމް ކޮށްފައި ވާއިރު ކ. ގުޅީފަޅުގައި ވެސް ޑްރަގް ރިމާންޑް ސެންޓަރު ސެންޓަރެއް ގާއިމް ކުރުމަށް ވަނީ ނިންމާފައެވެ.
އޭގެ އިތުރުން ގއ. ވިލިނގިލީގައި "ދަގެނާ" ގެ ނަމުގައިވަނީ އައުޓްޕޭޝަންޓް ކޮމިއުނިޓީ ޓްރީޓްމަންޓް އެންޑް ރިހެބިލިޓޭޝަން ސާވިސަސް ސެންޓަރެއް ހުޅުވާފައެވެ.
