ނުކުޅެދުންތެރިކަން ހުންނަ ފަރާތްްތަކަށް ފުޑްކޯޓަށް ވަނުމަށް އެޅިފައިވާ ހުރަސްތަކަށް ހައްލެއް ގެނެސްދިނުމުގެ މަސައްކަތް ސިޓީ ކައުންސިލުން ފަށައިފިއެވެ.
ސިޓީ ކައުންސިލުން ބުނީ ހާބަރު ސަރަހައްދުގައި ހުންނަ ފުޑް ކޯޓަށް ސައިކަލުގައި ނުވަދެވޭ ގޮތް ހެދުމަށް އެ ތަނުގައި ޖަހާފައި ހުރި ދަގަނޑުތައް ނެގުމުގެ މަސައްކަތް މިހާރު ފަށާފައި ވާކަމަށެވެ.
އެ މައްސަލަ ފެންމަތިވެފައި ވަނީ އިއްޔެ ނުކުޅެދުންތެރިކަން ހުންނަ މީހަކު ސޯޝަލް މީޑިއާގައި ހިއްސާކުރި ޕޯސްޓަކާ އެކުއެވެ. އެ ޕޯސްޓުގައި އޭނާ ވަނީ އާންމުކޮށް ގޮސް ވަދެ ހިތް ހަމަ ޖައްސާލަން އިންނަ ތަނަށް ނުވަދެވޭތީ އެކަމާ ކަންބޮޑުވުން ފާޅުކޮށްފައެވެ.
އާއްމު ތަންތަނުގެ ތެރޭގައި ހިމެނޭ ފުޑްކޯޓަށް ވަނުމުގައި ނުކުޅެދުންތެރިކަން ހުންނަ ފަރާތްތަކަށް ހުރަސް އެޅޭ ގޮތަށް ކަންހިނގުމުން، އާއްމު ފަރާތްތަކުން ކަންބޮޑުވުން ފާޅުކޮށްފައި ވާތީ، މާލޭ ސިޓީ ކައުންސިލުން މިހާރު މިކަން ހައްލު ކުރުމުގެ މަސައްކަތް ވަނީ ފަށާފައެވެ.
އެކަމާ ގުޅިގެން ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފު ވިދާޅުވީ މިއަދު އެ މައްސަލަ ރަނގަޅުކޮށް އެތަނަށް، ނުކުޅެދުންތެރިކަން ހުންނަ ފަރާތްތަކަށް ވެސް ވަދެވޭނެ ގޮތަށް އިންތިޒާމު ހަމަޖެހިގެން ދާނެއެވެ.
