ކޮވިޑް ބަލިމަޑުކަމުން އަރައިގަތުމަށް އަޅަފައިވާ ފިޔަވަޅުތަކަށް ލުއިދިނުމުގެ ގޮތުން މިއަދުން ފެށިގެން ކެފޭ، ހޮތާ އަދި ރެސްޓޯރަންޓް ތަކުން ހިދުމަތް ދެވޭ ވަގުތު އިތުރުކޮށްފިއެވެ.
އިކޮނޮމިކް މިނިސްޓްރީން މިއަދު ކުރި އިއުލާނެއްގައި ބުނީ، ކޮވިޑް-19 އިން ރައްކާތެރިވުމަށް އަޅާފައިވާ ހާއްސަ ފިޔަވަޅުތަކަށް ބަދަލު ގެނައުމާ ގުޅިގެން، މިއަދުން ފެށިގެން ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ހިދުމަތްދޭ ތަންތަން ހުޅުވާފައި ބެހެއްޓޭނެ ގަޑިއަކީ ފަތިހު 4:30 އިން މެންދަމު 1:00 އަށް ކަމަށެވެ.
ހިދުމަތް ދިނުމަށް ވަގުތު އިތުރުކޮށްފައި އޮތް ނަމަވެސް ކަސްޓަމަރުންނަށް ހުޅުވާލައިގެން ވިޔަފާރިކުރާ ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ހިދުމަތް ދޭ ތަންތަނުން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާ އުސޫލުތަކާއި އެއްގޮތަށް އަމަލުކުރަން ވާނެ ކަމަށް އިކޮނޮމިކް މިނިސްޓްރީން ބުނެއެވެ.
ކޮވިޑް ހާލަތަށް ބަދަލު އައިސް ރާއްޖޭގައި އަޅާފައިވާ ގިނަ ހަރުކަށި ފިޔަވަޅުތަކަށް މިހާރު ވަނީ ލުއިތައް ދީފައެވެ. އެގޮތުން މި މަހުގެ ތެރޭގައި ރާއްޖޭގެ ހުރިހާ ސްކޫލެއްގެ ހުރިހާ ގްރޭޑްތަކަށް ކިޔަވައިދިނުމަށް ވަނީ ނިންމާފައެވެ. އަދި މިއަދު ވަނީ ގުރުއާން ކްލާސްތަކާއި ޓިއުޝަން ކްލާސްތައް ހިންގުމުގެ ހުއްދަ ދީފައެވެ.
މިދިޔަ އަހަރު ފަހުކޮޅު ކޮވިޑް ކޭސްތައް މަދުވެފައި ވީ ނަމަވެސް މި އަހަރު ފެށުމަށް ފަހު ބައެއް ދުވަސް ދުވަހު ކޭސްތައް އިތުރުވަމުން ދާތަން އަންނަނީ ފެންނަމުންނެވެ. މިގޮތުން ފާއިތުވި ތިން ދުވަހުގެ ތެރޭގައި މުޅި ރާއްޖެއިން 118 އާ ކޭސް ފެނިފަވެއެވެ.
މިހާރު ވެސް ޕޮޒިޓިވް ކޭސްތައް ފެންނަމުން ދިޔަ ނަމަވެސް ލުއިތައް ދެމުންދާއިރު އިންޑިއާ ސަރުކާރުން ވަނީ 'ކޮވިޝީލްޑް' ވެކްސިންގެ 100،000 ޑޯޒް ދިވެހިރާއްޖެއަށް ހަދިޔާކޮށްފައެވެ. ވެކްސިން ލިބުމާއި އެކު ކަމާ ބެހޭ އިދާރާތަކުން މިހާރު އަންނަނީ މިހާރު ވެކްސިން ޖެހުމަށް ތައްޔާރީތައް ވަމުންނެވެ.
