ބަރަހަނާ ހާލުގައި ހުރެ އިސްލާމީ މަރުކަޒަށް ވަން ބިދޭސީއަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނީ އޭނާ ރޭ 8:29 ހާއިރު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
އެ މައްސަލައާ ގުޅިގެން ބަލަން ޖެހޭ ކަންތައްތައް ފުލުހުން ބަލަމުން ދާއިރު، މައުލޫމާތު ލިބިފައިވާ ގޮތުގައި އެ ހާދިސާގައި ބިދޭސީ މީހާ ފުރަތަމަ މިސްކިތަށް ވަނީ ސޯޓް ބުރިއަކާއި ޓީޝާޓެއް ލައިގެނެވެ.
އެ މީހާ މިސްކިތަށް އަރާ އަތްމައްޗަށް ނަގައިގެން ހުރެ އަޑުގަދަ ކުރަން ފެށުމުން މިސްކިތުގައި ތިބި މީހުން ވަނީ އޭނާއާ ސުވާލު ކޮށްފައެވެ. އޭގެ ޖަވާބުގައި ރަށަށް ދާން ބޭނުންވާ ކަމަށް އޭނާ ބުނެއެވެ. އަދި އޭނާ މިސްކިތުން ފައިބަން އެދުމުން ފައިބައިގެން ދިޔަ ނަމަވެސް އިރުކޮޅެއްގެ ފަހުން ބަރަހަނާވެ އަލުން މިސްކިތް ތެރެއަށް އޭނާ ވަނީއެވެ.
ބަންގްލަދޭޝަށް ނިސްބަތްވާ އެ މީހާ ހުއްޓުވީ ފުލުހުންނާއި ސިފައިންގެ އިތުރުން އާންމުން ވެގެންނެވެ.
މައުލޫމާތު ލިބިފައިވާ ގޮތުގައި އެ މީހާ ހައްޔަރު ކޮށްގެން ގެންދިޔައީ ގިނަ އިރުތަކަކު މިސްކިތް ތެރޭގައި ބަރަހަނާ ވެގެން އުޅެނިކޮށެވެ. އެ ހާދިސާގައި މިސްކިތުގެ ބައެއް ތަކެއްޗަށްވެސް ގެއްލުން ވެފައިވާ ކަމަށް މައުލޫމާތު ލިބެއެވެ.
