ކޮވިޑް ޖެހިގެން ރާއްޖެއިން މަރުވި މީހުންގެ އަދަދު 50 އަށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މިއަދު ކޮވިޑް ބަލީގައި ނިޔާވެފައި ވަނީ އުމުރުން 77 އަހަރުގެ ދިވެހި ފިރިހެނެއް ކަމަށެވެ. އެމީހާ ވަނީ މިއަދު ހެނދުނު އައިޖީއެމްއެޗްގެ އެމްޖެންސީ ރޫމަށް ގެންގޮސްފައި ކަމަށާއި އަދި ގެންދިޔައިރު ވެސް އޭނާގެ އެއްވެސް ހަރަކާތެއް ނެތްކަމަށް އެޗްޕީއޭއިން ބުނެއެވެ. އޭނާ ނިޔާވެފައި ވަނީ މިއަދު ހެނދުނު 10:14 ގައި ކަމަށް އައިޖީއެމްއެޗްއާ ހަވާލާދީ އެޗްޕީއޭއިން ބުނެއެވެ.
މިއީ ކޮވިޑް ޖެހިގެން ރާއްޖޭގައި ނިޔާވި 50 ވަނަ މީހާ ކަމަށް އެޗްޕީއޭއިން ބުނެއެވެ.
50 މީހުން މިހާތަނަށް ނިޔާވެފައި ވާއިރު، އޭގެތެރޭގައި ހިމެނެނީ 43 ދިވެހިންނާއި ހަތް ބިދޭސީންނެވެ. އެ ބިދޭސީންގެ ތެރޭގައި ހިމެނެނީ ބަންގްލަދޭޝްގެ ހަ މީހަކާއި ފިލިޕީންސް މީހެކެވެ.
މިހާތަނަށް ކޮވިޑް ބަލީގައި ނިޔާވި 50 މީހުންގެ އިތުރުން ކޮވިޑަށް ޕޮޒިޓިވްވި 7 މީހަކު ވެސް ވަނީ ނިޔާވެފައެވެ. އަދި އެ 7 މީހުންނަކީ ކޮވިޑް މަރެއް ނޫން ކަމަށް އެޗްޕީއޭއިން ވަނީ ނިންމާފައެވެ.
