ކުރީގެ ރައީސް އަބްދުﷲ ޔާމީންގެ ޝަރީއަތާ ދިމާކޮށް ގްރީން ޒޯން އަދި ހައިކޯޓު ސަރަހައްދު ބަންދު ކޮށްފިއެވެ.
ފުލުހުން ބުނީ ސަލާމަތީ ބޭނުމަކަށްޓަކައި ގްރީން ޒޯން އަދި ހައި ކޯޓު ހިމެނޭ ސަރަހައްދު މިއަދު 01:00 އިން ފެށިގެން އާންމު ދަތުރުފަތުރަށް ބަންދު ކޮށްފައިވާ ކަމަށެވެ.
ގއ. ވޮޑަމުލާ ކުއްޔަށް ދޫކުރުމުގައި މަނީ ލޯންޑާކޮށްފައިވާ ކަމަށް ބުނާ މައްސަލަ ރައީސް ޔާމީންގެ ފަރާތުން ހައިކޯޓުގައި އިސްތިއުނާފު ކުރައްވާފައިވާ އިރު މިއަދު އޮތީ މިމައްސަލައިގެ ހުކުމް ކުރުމުގެ އަޑުއެހުމެވެ. ހައިކޯޓުން އިއްޔެ ވަނީ މިއަދުގެ ޝަރީއަތުގެ މަޖިލީސް އެކޯޓުގެ ޔޫޓިއުބް ޗެނަލް މެދުވެރިކޮށް ލައިވް ކުރާނެ ކަމަށް ބުނެފައެވެ.
މި މައްސަލައިގެ ހުކުމް އިއްވުން ހައި ކޯޓުން ތާވަލު ކޮށްފައި ވަނީ މިއަދު މެންދުރު 02:15 އަށެވެ.
ގއ ވޮޑަމުލާ ކުއްޔަށް ދޫކުރުމުގައި މަނީ ލޯންޑާ ކޮށްފައިވާ ކަން ސާބިތުވެ، ކްރިމިނަލް ކޯޓުން ރައީސް ޔާމީންގެ މައްޗަށް ހުކުމް ކޮށްފައި ވަނީ 5 އަހަރު ދުވަހަށް ޖަލަށް ލުމަށާއި، 5 މިލިއަން ޑޮލަރުން (77 މިލިއަން ރުފިޔާ) ޖޫރިމަނާ ކުރުމަށެވެ.
