2020 ވަނަ އަހަރު ފުލުހުންނަށް ހުށަހެޅި ގެވެށި އަނިޔާގެ މައްސަލަތައް 2019 ވަނަ އަހަރާ އަޅާބަލާއިރު ގިނަ ކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި 2020 ވަނަ އަހަރު ގެވެށި އަނިޔާގެ 245 މައްސަލައެއް ހުށަހަޅާފައި ވާއިރު، 2019 ވަނަ އަހަރު ހުށަހަޅާފައި ވަނީ 219 މައްސަލައެކެވެ. އަދި 2020 ވަނަ އަހަރު ޖިންސީ ފުރައްސާރައިގެ 72 މައްސަލައެއް ހުށަހަޅާފައި ވާއިރު، 2019 ވަނަ އަހަރު ހުށަހަޅާފައި ވަނީ 38 މައްސަލައެކެވެ.
ހަމައެއާއެކު 2020 ވަނަ އަހަރު، ބަދުއަހުލާގީ މައްސަލަތަކުގެ 490 މައްސަލައެއް ހުށަހަޅާފައި ވާއިރު، 2019 ވަނަ އަހަރު ހުށަހަޅާފައި ވަނީ 411 މައްސަލައެކެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި ކައުންޓާ ފީޑް ފޯޖަރީގެ 108 މައްސަލައެއް މިދިޔަ އަހަރު ހުށަހަޅާފައި ވާއިރު، 2019 ވަނަ އަހަރު ހުށަހެޅީ 87 މައްސަލައެކެވެ. އަދި މަކަރާއި ހީލަތުގެ 609 މައްސަލައެއް މިދިޔަ އަހަރު ހުށަހަޅާފައި ވާއިރު 2019 ވަނަ އަހަރު ހުށަހަޅާފައި ވަނީ 498 މައްސަލައެކެވެ.
ބަދުއަހުލާގީ މައްސަލަތަކާއި، ޖިންސީ ފުރައްސާރައިގެ މައްސަލަތަކާއި، ގެވެށި އަނިޔާގެ މައްސަލަތަކުގެ އިތުރުން ކައުންޓާ ފީޑް ފޯޖަރީގެ މައްސަލަތަކާއި، މަކަރާ ހީލަތުގެ މައްސަލަތައް ހުށަހެޅި އަދަދު ގިނަ ވިޔަސް، ބައެއް އެހެން މައްސަލަތައް ހުށަހެޅި އަދަދު މަދު ކަން ފުލުހުން ވަނީ ފާހަގަ ކޮށްފައެވެ. އެގޮތުން، ވައްކަމާއި މަސްތުވާތަކެއްޗާއި ފޭރުމާއި މާރާމާރީގެ މައްސަލަތަކުގެ އިތުރުން މުދަލަށް ގެއްލުން ދިނުމުގެ މައްސަލަތަކާއި ޓްރެފިކްގެ މައްސަލަތައް މަދު ކަން ފުލުހުން ވަނީ ފާހަގަ ކޮށްފައެވެ.
ފުލުހުންގެ ތަފާސް ހިސާބަށް ބަލާއިރު، 2019 ވަނަ އަހަރުގެ ޖެނުއަރީ މަހުން ފެށިގެން ޑިސެމްބަރު މަހުގެ ނިޔަލަށް ޖުމްލަ 16482 މައްސަލައެއް ހުށަހަޅާފައި ވެއެވެ. އަދި 2020 ވަނަ އަހަރުގެ ޖެނުއަރީ މަހުން ފެށިގެން ޑިސެމްބަރު މަހުގެ ނިޔަލަށް ހުށަހަޅާފައި ވަނީ 12787 މައްސަލައެވެ. އެއީ މާލެ ސަަރަހައްދުން 8060 މައްސަލައަކާއި އަތޮޅުތަކުން 4727 މައްސަލައެކެވެ.
އެކި މައްސަލަތަކާ ގުޅިގެން ހައްޔަރު ކޮށްފައިވާ މީހުންގެ ތަފާސް ހިސާބަށް ބަލާއިރު، އެކި މައްސަލަތަކާ ގުޅިގެން 2019 ވަނަ އަހަރު 3327 މީހުން ހައްޔަރު ކޮށްފައި ވާއިރު، 2020 ވަނަ އަހަރު ހައްޔަރު ކުރީ 3849 މީހެކެވެ. މީގެއިތުރުން ފުލުހުންނަށް ހުށަހެޅި މައްސަލަތަކުގެ ތަހުގީގު ނިންމައި ޕީޖީއަށް ފޮނުވާފައިވާ މައްސަލަތަކުގެ އަދަދު ވެސް 2020 ވަނަ އަހަރު ގިނަކަން ފާހަގަ ކުރެވެއެވެ. އެގޮތުން 2019 ވަނަ އަހަރު 1571 މައްސަލައެއް ޕީޖީއަށް ފޮނުވާފައި ވާއިރު، 2020 ވަނަ އަހަރު ޕީޖީއަށް ފިނުވީ 1724 މައްސަލައެކެވެ.
