ވިލިމާލެ މުހްޔިއްދީން ސްކޫލުގެ މުވައްޒަފަކު ކޮވިޑް-19 އަށް ޕޮޒިޓިވް ވެއްޖެއެވެ.
'ދަ ޕްރެސް' އަށް މައުލޫމާތު ލިބިފައިވާ ގޮތުގައި އެ ސްކޫލުން ޕޮޒިޓިވް ވެފައި ވަނީ އެ ސްކޫލުގެ ސަޕޯޓް ސްޓާފެކެވެ. އަދި އެޗްޕީއޭގެ ކޮންޓެކްޓް ޓްރޭސިން އިން ދައްކާ ގޮތުން، މި މުވައްޒަފު އެއްވެސް ދަރިވަރަކާ ނުވަތަ ޓީޗަރަކާ ވެސް ކޮންޓެކްޓް ވެފައި ނުވާ ކަމަށް މައުލޫމާތު ލިބެއެވެ.
މިކަމާ ގުޅިގެން އަޅަން ޖެހޭ ފިޔަވަޅުތައް އެޗްޕީއޭ އަދި އެޑިއުކޭޝަން މިނިސްޓްރީގެ އިރުޝާދުގެ މަތިން ސްކޫލުން ދަނީ އަޅަމުންނެވެ. އަަދި ރައްކާތެރިވުމުގެ ގޮތުން އަޅަން ޖެހޭ ހުރިހާ ފިޔަވަޅެއް ވެސް ސްކޫލުގައި އަޅާފައިވާ ކަމަށް މައުލޫމާތު ލިބެއެވެ.
މުހްޔިއްދީން ސްކޫލުގެ މުވައްޒަފަކު ޕޮޒިޓިވް ވެފައި ވާއިރު، އިއްޔެ ރާއްޖެއިން ޕޮޒިޓިވްވި މީހުންގެ އަދަދު 50 އަށް އަރައެވެ. އެއީ މާލެ ސަރަހައްދުން ޕޮޒިޓިވް ވި 27 މީހަކާއި، އަތޮޅު ތެރެއިން މީހުން ދިރިއުޅޭ ރަށްރަށުން 16 މީހަކާއި ހިންގަމުން ދާ ރިސޯޓަކުން 7 މީހެކެވެ. މިވަގުތު މިބަލި ޖެހިފައި ތިބި މީހުންގެ އަދަދު 845 ގައި އުޅޭ އިރު، އެމީހުންގެ ތެރެއިން 61 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
ސިއްހީ ކުއްލި ނުރައްކަލުގެ މިހާލަތުގައި ސްކޫލްތައް ހުޅުވައިގެން ކިޔަވައި ދެމުން ދާއިރު، މަދުން ނަމަވެސް ސްކޫލް ތެރެއިން ވެސް ދަނީ ކޮވިޑް ޕޮޒިޓިވް ކޭސްތައް ފެންނަމުންނެވެ. ނަމަވެސް މި ކޭސްތަކުގެ ކޮންޓެކްޓުން ސްކޫލުތަކުން ނުފެންނަ ކަމަށާއި، ސްކޫލުތަކަކީ އެންމެ ބޮޑަށް ރައްކާތެރިކަމުގެ ފިޔަވަޅުތައް އަޅާފައިވާ ތަންތަން ކަމުގައި އެޗްއީއޯސީން ދަނީ ބުނަމުންނެވެ.
މުހްޔިއްދީން ސްކޫލުގެ މުވައްޒަފަކު ޕޮޒިޓިވް ވެފައި ވާއިރު، އަމީނިއްޔާ ސްކޫލުގެ ޓީޗަރަކު އަދި ގއ. އަތޮޅު ތައުލީމީ މަރުކަޒުގެ ދަރިވަރަކު ވެސް ވަނީ ކޮވިޑަށް ޕޮޒިޓިވް ވެފައެވެ.
