މިއަހަރުގެ މިހާތަނަށް ރާއްޖެއަށް އައި ފަތުރުވެރިންގެ ތެރެއިން 83 ފަތުރުވެރިން ކޮވިޑަށް ޕޮޒިޓިވް ވެފައިވާ ކަަމަށް ޓޫރިޒަމް މިނިސްޓްރީގެ ތަފާސު ހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން ނެރުނު ތަފާސް ހިސާބުތަކުން ދައްކާ ގޮތުގައި މި އަހަރު ފެށުނު ފަހުން އިއްޔެގެ ނިޔަލަށް ރާއްޖެއަށް ވަނީ 37،926 ފަތުރުވެރިން ޒިޔާރަތް ކޮށްފައެވެ. އޭގެތެރެއިން 0.22 ޕަސެންޓް ފަތުރުވެރިން ކޮވިޑަށް ޕޮޒިޓިވްވެފައިވާ ކަމަށް އެ ތަފާސް ހިސާބުތަކުން ދައްކައެވެ.
ރާއްޖެއަށް މި މަހު 37،926 ފަތުރުވެރިން އައިސްފައިވާ އިރު، އޭގެތެރެއިން އެންމެ ގިނަ ފަތުރުވެރިން އައިސްފައި ވަނީ ރަޝީއާއިންނާއި އިންޑިއާ އަދި ޔޫކްރެއިން އިން ކަމަށް ޓޫރިޒަމް މިނިސްޓްރީން ބުނެއެވެ. އެގޮތުން ރަޝިއާއިން 10،002 ފަތުރުވެރިން، އިންޑިއާއިން 5،727 ފަތުރުވެރިން އަދި ޔޫކްރެއިން އިން 3،472 ފަތުރުވެރިން ރާއްޖެއަށް ޒިޔާރަތްކޮށްފައި ވެއެވެ.
މިހާރު ރާއްޖޭގެ ގިނަ ރިސޯޓުތަކުން ކޮވިޑް ކޭސްތައް ފެންނަމުންދާ އިރު އޭގެތެރޭގައި ނިޔަމަ ޕްރައިވެޓް އައިލެންޑްސް މޯލްޑިވްސް ރިސޯޓާއި، ސަން ޝިޔާމް އޮޅުވެލި ރިސޯޓާއި، ބިޔާދޫ އައިލެންޑް ރިސޯޓުގެ އިތުރުން އޮބްލޫ ސަންގެލި ރިސޯޓް ހިމެނެއެވެ. މި ރިސޯޓްތަކުން ފެނިފައިވާ ކޭސްތަކުގައި ގިނައީ ސްޓާފުންކަން ފާހަގަ ކުރެވެއެވެ.
މި ކޭސްތަކާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ މައުލޫމާތަށް ބަލާއިރު، ނިޔަމަ ރިސޯޓުން މި މަހުގެ 7 ވަނަ ދުވަހާ ހަމައަށް ވަނީ ޖުމްލަ 14 ކޭސް ފެނިފައެވެ. އޮޅުވެލި ރިސޯޓުން މި މަހުގެ 11 ވަނަ ދުވަހާ ހަމައަށް ވަނީ ޖުމްލަ 24 ކޭސް ފެނިފައެވެ. އޮބްލޫ ސަންގެލި ރިސޯޓުން މި މަހުގެ 13 އާ ހަމައަށް ޖުމްލަ 32 ކޭސް ފެނިފައިވާ އިރު، ބިޔާދޫ އައިލެންޑް ރިސޯޓުން މި މަހުގެ 11 އާ ހަމައަށް ޖުމްލަ 53 ކޭސް ވަނީ ފެނިފައެވެ.
