ދ. އަތޮޅުގެ ކަނޑިންމަ ރިސޯޓް ހިމެނޭ ފަޅުގައި އޮންނަ ފަޅު ރަށްތަކުގައި ސިފައިންގެ އަސްކަރީ ތަމްރީނު ތަކެއް ކުރިއަށް އެބަ ގެންދެއެވެ.
އެމްއެންޑީއެފުން ބުނީ، ސިފައިންގެ އަސްކަރީ ތަމްރީނުތައް ފެށީ އިއްޔެ ކަމަށާއި މި މަހުގެ 16 އަށް ކުރިއަށް ދާނެ ކަމަށެވެ.
މި ތަމްރީނުތަކުގައި ބައެއް ބާވަތްތަކުގެ ޕައިރޯޓެކްނިކް ބޭނުން ކުރާނެ ކަމަށްވެސް އެމްއެންޑީއެފުން ބުނެއެވެ.
އެމްއެންޑީއެފުން ދަނީ ދޭތެރެ ދޭތެރެއިން މިފަދަ އަސްކަރީ ތަމްރީނުތައް ބާއްވަމުންނެވެ. އެގޮތުން މި މަހުގެ 7 އިން 10 އަށް ސިފައިންގެ ހާއްސަ ތަމްރީން ޕްރޮގްރާމެއް ޅ. އަތޮޅުގެ ރަށްރަށުގައި ވަނީ ކުރިއަށް ގެންގޮސްފައެވެ. އެ ތަމްރީން ތަކުގައި ސިފައިން ހަތިޔާރާއެކު ހަރަކާތްތައް ހިންގާފައި ވާއިރު ބައެއް ބާވަތްތަކުގެ ޕައިރޯޓެކްނިކްސް ވެސް ވަނީ ބޭނުން ކޮށްފައެވެ.
ސިފައިންގެ މިފަދަ ތަމްރީންތައް ހިންގަނީ ރާއްޖޭގެ ސަލާމަތަށް ނުރައްކަލެއް އޮވެގެން ނޫން ކަމަށް އެމްއެންޑީއެފުން ވަނީ މީގެ ކުރިން ވެސް ބުނެފައެވެ.
