ރައީސް އޮފީހުގެ ތަރުޖަމާނަކަށް އަންޑަ ސެކެޓްރީ ކަމުގައި ހުންނެވި މުހައްމަދު މަބްރޫކް އަޒީޒް ހަމަޖައްސައިފިއެވެ.
މަބްރޫކް މި މަގާމަށް އައްޔަން ކުރެއްވުމަށް ރައީސ އިބްރާހިމް މުހައްމަދު ސޯލިހް ނިންމަވާފައި ވަނީ މިމަހު 1 ވަނަ ދުވަހެވެ. އެހެންކަމުން ޖެނުއަރީ 1، 2021 އިން ފެށިގެން ރައީސް އޮފީހުގެ ތަރުޖަމާނަކީ މަބްރޫކެވެ. އޭނާ ތަރުޖަމާނު ކަމުގެ މަގާމަށް ހަމަޖެއްސީ ވަޒީރުންގެ ނައިބުންގެ ފެންވަރުގައެވެ.
ރައީސް އޮފީހުގެ ކުރީގެ ތަރުޖަމާނު އިބްރާހިމް ހޫދަކީ އަދިވެސް އެ އޮފީހުގެ ޗީފް ކޮމިއުނިކޭޝަން ސްޓްރެޖިސްޓެވެ. ތަރުޖަމާނުގެ މަގާމަށް މަބްރޫކް އައްޔަން ކުރުމާއެކު، ހޫދު ވަނީ ރައީސް އޮފީހުގެ ތަރުޖަމާނުގެ ރަސްމީ ޓްވިޓާ އެކައުންޓް މަބްރޫކާ ހަވާލު ކުރައްވާފައެވެ.
ހޫދު ވިދާޅުވީ އަދިވެސް ޗީފް ކޮމިއުނިކޭޝަން ސްޓްރެޖިސްޓްގެ މަގާމުގައި ހުންނަވައިގެން މަގާމުގެ މަސްއޫލިއްޔަތު ފުރިހަމައަށް އަދާ ކުރުމާއެކު ރައީސް އޮފީހުގެ ކޮމިއުނިކޭޝަންސް ޑިޕާޓްމަންޓް ކުރިއެރުވުމަށް ވެސް މަސައްކަތް ކުރައްވާނެ ކަމަށެވެ.
ރައީސް އޮފީހުގެ ތަރުޖަމާނުގެ ގޮތުގައި ހޫދު މަސައްކަތް ކުރެއްވީ ނޮވެމްބަރު 29، 2018 އިން ފަށައިގެން ޑިސެމްބަރު 31، 2020 އާ ހަމައަށެވެ.
ބަރާބަރު. ޖެހިލުމެއް އަޅައިގަތުމެއް ނެތި ފަރިތަކަމާކު ދޮގުތައް އަމުނާލަދޭނެ. ފައްކާވާނެ.