ސިފައިންގެ ވަޒީފާއަށް އެދި ފޯމް ހުށަހަޅާފައިވާ ފަރާތްތަކަށް މާލޭގައި ބާއްވާ އިންޓަވިއު ފަށައިފިއެވެ.
އެމްއެންޑީއެފުން ބުނީ، މިދިޔަ އަހަރުގެ ނިޔަލަށް ސިފައިންގެ ވަޒީފާއަށް އެދި ފޯމް ހުށަހަޅާފައި ވާ ފަރާތްތަކަށް މާލެ ސިޓީގައި ބާއްވާ އިންޓަވިއުތައް އޮންނާނީ މިއަދުން ފެށިގެން މި މަހުގެ 14 އަށް އަދި މި މަހުގެ 19 އިން މި މަހުގެ 21 އަށް ސޯޝަލް ސެންޓަރުގެ ސެމިނާ ރޫމުގައި ކަމަށެވެ.
ސިފައިންގެ ވަޒީފާއަށް އެދި ފޯމް ހުށަހަޅާފައި ވާ ފަރާތްތަކަށް ބާއްވާ އިންޓަވިއުތައް މިހާރު ފެށިގެން ކުރިއަށް ދާ އިރު މާލެ ސިޓީގެ އިތުރުން އެމްއެންޑީއެފްގެ އޭރިއާ ތަކުގައި ވެސް ކުރިއަށް ދާނެ ކަމަށް އެމްއެންޑީއެފުން ބުނެއެވެ. އެގޮތުން އެމްއެންޑީއެފް ނޮދަން އޭރިއާ، އެމްއެންޑީއެފް ސެންޓްރަލް އޭރިއާ އަދި އެމްއެންޑީއެފް ސަދަން އޭރިއާގައި ވެސް މި އިންޓަވިއުތައް ބާއްވާ ގޮތަށް ވަނީ ހަމަޖެހިފައެވެ.
ސިފައިންގެ ވަޒީފާއަށް އެދި ފޯމް ހުށަހަޅާފައިވާ ފަރާތްތައް، އިންޓަވިއުއަށް އަންނަން ޖެހޭ ދުވަހާއި ގަޑި އެމްއެންޑީއެފްގެ ހެޑް ކްއޯޓާޒް އިން އެފަރާތްތަކަށް އަންގަމުންދާނެ ކަމަށް އެމްއެންޑީއެފުން ބުނެއެވެ.
މީގެ އިތުރުން އެމްއެންޑީއެފުން ބުނީ ސިފައިންގެ ވަޒީފާއަށް އެދި ހުށަހެޅުމުގެ މުއްދަތު، މި މަހުގެ ނިޔަލަށް އިތުރު ކޮށްފައި ވާއިރު، ސިފައިންގެ ވަޒީފާއަށް ވަނުމުގެ އުމުރުފުރާ ބަލާ ތާރީހުވެސް ވަނީ އަންނަ މަހުގެ 4 އަށް ބަދަލު ކޮށްފައި ކަމަށެވެ. މި މަހުގެ 1 އިން 31 އަށް ސިފައިންގެ ވަޒީފާއަށް އެދި ހުށަހަޅާ ފަރާތްތަކުގެ އިންޓަވިއުތައް ފަހުގެ ތާރީހެއްގައި ބޭއްވުމަށް ހަމަޖެހިފައިވާ ކަމަށް އެ ފަރާތުން ބުނެއެވެ.
