ށ. ކަނޑިތީމު ފަޅުގައި އޮތް ޕެޓްރޯލް އުފުލާ ދޯންޏެއްގައި ރޯވެ އަނދައިފިއެވެ.
ފުލުހުން ބުނީ، ރޯވީ ޕެޓްރޯލް އުފުލަން ގެންގުޅޭ ލަކުޑި ދޯންޏެއްގައި ކަމަށެވެ. އަދި އެ ހާދިސާގައި އެއްވެސް މީހަކަށް އަނިޔާއެއް ނުވާ ކަމަށްވެސް ފުލުހުން ބުނެއެވެ.
ފުލުހުން ބުނީ އެ ހާދިސާ ހިނގީ މިރޭ 10:45 ހާއިރު ކަމަށާއި، އަލިފާން ރޯވެފައިވާ ދޯންޏާ ކައިރީގައި ހުރި އެއްޗެހި ފުލުހުންނާއި ރައްޔިތުން ގުޅިގެން ދުރައް ޖައްސާފައި ވާކަމަށެވެ.
އަދި މިހާރުވެސް އަލިފާން ނިއްވުމުގެ މަސައްކަތުގައި ފުލުހުންނާއި އާންމުން ހަރަކާތްތެރިވަމުން ދާ ކަމަށްވެސް ވަނީ ބުނެފައެވެ.
ށ. ކަނޑިތީމުގައި މި ހާދިސާ ހިނގާފައި ވާއިރު މިއަދު އިރު އޮށްސި 6 ޖެހި އިރު ގދ ތިނަދޫގައިވެސް ވަނީ އަލިފާނުގެ ހާދިސާއެއް ހިނގާފައެވެ. އެ ހާދިސާ ހިނގާފައި ވަނީ ގދ. ތިނަދޫ ގައި ހުރި ދަގަނޑު ޓޭންކެއް ކެފުމުގެ މަސައްކަތް ކުރަނިކޮށް ކަމަށް ފުލުހުން ބުނެފައި ވެއެވެ.
މިއަހަރުގެ ފުރަތަމަ 9 ދުވަސް ފާއިރު ވި އިރު އަލިފާނުގެ ތަފާތު ހާދިސާތައް ރާއްޖޭގައި ވަނީ ހިނގާފައެވެ. އޭގެ ތެރޭގައި ގއ. ވިލިނގިލީގެ ފްޓްސަލް ދަނޑުގައި ރޯކޮށްލުމާއި، އޮޅުވެލި ރިސޯޓުގެ ގެސްޓް ރޫމެއް ރޯވެ ހިނގި ހާދިސާއެއް ފާހަގަ ކޮށްލެވެއެވެ.
