ޏ ފުވައްމުލަކުގައި މޫދަށް އެރި އުޅުނު 17 އަހަރުގެ ކުއްޖަކު ގެއްލިގެން ހޯދަން ފަށައިފިއެވެ.
ފުލުހުން ބުނީ ފުވައްމުލަކު މާނޭރެ އަތިރި ސަރަހައްދަށް މޫދަށް އެރި އުޅުނު 17 އަހަރުގެ ހުއްޖަކު ގެއްލިފައިވާ ކަމުގެ މައުލޫމާތު މިއަދު ހަވީރު 4:47 ހާއިރު ލިބިފައިވާ ކަމަށެވެ. އަދި މިހާރު އެ ކުއްޖާ ހޯދުމަށް އެ ސަރަހައްދުގައި ފުލުހުން ދަނީ ހަރަކާތްތެރި ވަމުން ކަމަށް ފުލުހުން މައުލޫމާތު ދެއެވެ.
ގެއްލުނު ކުއްޖާ ހޯދަމުން ދަނިކޮށް ފުވައްމުލަކު މާނޭރެ އަތިރި ސަރަހައްދު މޫދު އަޑިން އެ ކުއްޖާ ފެނިފައިވާ ކަމަށް ފުލުހުން ބުނެއެވެ. އެ ކުއްޖާ ފެނުނީ މިއަދު ހަވީރު 5:50 ހާއިރު ކަމަށް ފުލުހުން މައުލޫމާތު ދެއެވެ.
ގެއްލިފައި ވަނީ ގްރޭޑް 10ގައި ކިޔަވަމުންދާ އަހްމަދު ފައުޒާން ހަސަން ނަމަކަށް ކިޔާ އުމުރުން 17 އަހަރުގެ ކުއްޖެކެވެ. މިއަދު ހަވީރު އެ ކުއްޖާ މޫދަށް އެރިފައި ވަނީ އެކުގައި މޫދަށް ދިޔަ އަންހެން ކުއްޖަކު އޮޔާ ދަމައިގަތުމުން، އެ ކުއްޖާ ސަލާމަތް ކުރުމަށެވެ.
އެވަގުތު މޫދު ސަރަހައްދުގައި ތިބި މީހުން ދީފައިވާ މައުލޫމާތުތަކަށް ބަލާލާއިރު، އެ ކުދިން އޮޔާ ދަމައިގެންފައި ވަނީ ކުއްލިއަކަށެވެ. ކުއްލިއަކަށް ރާޅު ބޮޑުވެ، އޮއި ގަދަވި ވަގުތު ފައުޒާން މޫދަށް ފުންމާލީ އޮޔާ ދަމައިގަތް އަންހެން ކުއްޖާ ސަލާމަތް ކުރުމަށެވެ. އަންހެން ކުއްޖާ ސަލާމަތް ކޮށް، ފަރު މައްޗަށް އެރުވުމަށްފަހު ފައުޒާން ގެއްލުނެވެ. އެއާއެކު އޭނާ ހޯދުމުގެ މަސައްކަތް ކުރަމުން ދަނިކޮށް އޭނާ ފެނިފައި ވަނީ ގަޑިއެއްހާއިރު ފަހުން މޫދު އަޑިންނެވެ.
ފައުޒާން ފެނުނީ އޭނާ މޫދަށް ފުންމާލި ދިމާ މޫދު އަޑީގައި ފަރުގައި ތާށިވެފައި އޮއްވައެވެ. އޭނާ މޫދުން ނަގައިގެން އެމްބިއުލާންސްގައި ހޮސްޕިޓަލަށް ގެންދިޔަ އިރުވެސް އޭނާ ސަލާމަތް ކުރުމަށް ސީޕީއާރް ދެމުން ދިޔަ ކަމަށް ވެސް އެ ސަރަހައްދުގައި ތިބި މީހުން މައުލޫމާތު ދެއެވެ. ޑޮކްޓަރުން މިހާރު ވަނީ ފައުޒާންގެ މަރު ކަށަވަރު ކޮށްދީފައެވެ.
