މިއަދުން ފެށިގެން ކުރިއަށް އޮތް 3 ދުވަހު ނޮދަން އޭރިއާ ކޮމާންޑްގައި ސިފައިންގެ ހާއްސަ އަސްކަރީ ތަމްރީނު ތަކެއް ބާއްވަން ނިންމައިފިއެވެ.
މިނިސްޓްރީ އޮފް ޑިފެންސުން ބުނީ، މޯލްޑިވްސް ނޭޝަނަލް ޑިފެންސް ފޯސް (އެމްއެންޑިއެފުން) ނޮދަން އޭރިއާ ކޮމާންޑްގައި ހާއްސަ އަސްކަރީ ތަމްރީނުތަކެއް ޅ. އަތޮޅުގެ ރަށްރަށުގަ އާއި ބައެއް ރިސޯޓުތަކުގައި ކުރިއަށް ގެންދާނެ ކަމަށެވެ. އެ ގޮތުން މި ތަމްރީން ކުރިއަށް ދާނީ މިއަދުން ފެށިގެން އަންނަ އާދިއްތަ ދުވަހުގެ ނިޔަލަށް ކަމަށް ޑިފެންސް މިނިސްޓްރީން ބުނެއެވެ.
މި ތަމްރީނުތަކުގައި ސިފައިން ހަރަކާތްތެރިވާނީ ހަތިޔާރާއެކު ކަމަށާއި މި ތަމްރީނުގައި ބައެއް ބާވަތްތަކުގެ ޕައިރޯޓެކްނިކް ބޭނުން ކުރުމަށް ވެސް ވަނީ ހަމަޖެހިފައި ކަމަށް ޑިފެންސް މިނިސްޓްރީން ބުނެއެވެ.
އެމްއެންޑީއެފުން ދަނީ ދޭތެރެ ދޭތެރެއިން ހަތިޔާރާއެކު މިފަދަ އަސްކަރީ ތަމްރީނުތައް ބާއްވަމުންނެވެ. އަދި މިއީ ރާއްޖޭގެ ސަލާމަތަށް ނުރައްކަލެއް އޮވެގެން ކުރިއަށް ގެންދާ ތަމްރީނު ތަކެއް ނޫން ކަމަށް އެމްއެންޑީއެފުން ވަނީ މީގެ ކުރިން ވެސް ބުނެފައެވެ.
އެގޮތުން މިދިޔަ ނޮވެމްބަރު މަހުގެ ތެރޭގައި ގޮވާތަކެއްޗާއެކު ސިފައިން ވަނީ ހުޅުމާލޭގައި ތަމްރީންތަކެއް ކުރިއަށް ގެންގިސްފައެވެ.
