ކޮވިޑް ޖެހި ފަރުވާ ދެމުން ދަނިކޮށް، ސުޕްރީމް ކޯޓުގެ ކުރީގެ ފަނޑިޔާރު މުޖުތާޒު ފަހުމީ ރޭ އަވާހަރަ ވެއްޖެއެވެ.
އޭނާގެ އާއިލާގެ ބޭފުޅަކު އެކަން ހާމަ ކުރައްވަމުން ވިދާޅުވީ މުޖުތާޒު އަވާހަރަ ވީ ރޭ ދަންވަރު 2 ޖެހި އިރު ކަމަށެވެ.
އުމުރުން 61 އަހަރުގެ މުޖުތާޒަށް ކޮވިޑް ޖެހުނުކަން އެނގުނީ، މި މަހުގެ 4 ވަނަ ދުވަހު، ލ. އަތޮޅަށް ކުރެއްވި ޗުއްޓީ ދަތުރެއްގައި އެ އަތޮޅު ކުޑަފުށީގައި ކަރަންޓީނުގައި ހުންނަވަނިކޮށް ބަލީގެ އަލާމަތްތަކެއް ފެނިގެން ޓެސްޓް ކުރުމުން ކަމަށް ވަނީ އެނގިފައެވެ. އާއިލާއާ އެކު ކުރެއްވި އެ ދަތުރުގައި ކޮވިޑަށް ޕޮޒިޓިވް ވުމުން ލ. ގަމުގައި ހުންނަ ކޮވިޑް ފެސިލިޓީއަށް އޭނާ ގެންދިޔައެވެ.
މައުލޫމާތު ލިބިފައިވާ ގޮތުގައި އޭނާގެ ހާލު ގޯސްވެފައި ވަނީ އިއްޔެއެވެ. ނޭވާއަށް އުނދަގޫވެ ހާލު ދެރަވެގެން މުޖުތާޒު މާލެ ގެނެސްފައި ވަނީ ވެންޓިލޭޓަރު ގައެވެ. ނަމަވެސް ފަހުން ވެންޓިލޭޓަރުން ނަގާ ފަރުވާ ދެމުން ގެންދިޔައީ ދަރުމަވަންތަ ހޮސްޕިޓަލުގައެވެ.
މުޖުތާޒު ސުޕްރީމް ކޯޓުގެ ފަނޑިޔާރު ކަމުގެ މަގާމުގައި ހުންނެވީ ސެޕްޓެމްބަރު 18، 2008 އިން ފެށިގެން އޮގަސްޓް 10، 2010 އާ ހަމައަށެވެ. ފަނޑިޔާރު ކަމުން އޭނާ ރިޓަޔާ ކުރެއްވީއެވެ.
މުޖުތާޒު ވަނީ ރީގެ މަދަނީ ކޯޓުގެ އިސް ގާޒީކަން ކުރެއްވުމުގެ އިތުރުން އިންތިގާލީ މަރުހަލާގައި ސުޕްރީމް ކޯޓުގެ ފަނޑިޔާރުކަންވެސް ކުރައްވާފައެވެ. އޭނާގެ ދަރިކަލުން އަޒްހާން ފަހުމީ ވަނީ މާވަށު ދާއިރާގެ މެމްބަރުކަން ވެސް ކުރައްވައިފައެވެ. މީގެ އިތުރުން މުޖުތާޒަކީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އާއި ކްރިމިނަލް ކޯޓުގެ ފަނޑިޔާރު މުހުތާޒު ފަހުމީގެ ބޭބެއެވެ.
