ކޮވިޑް-19 އަށް ޕޮޒިޓިވްވެ، ސުޕްރީމް ކޯޓުގެ ކުރީގެ ފަނޑިޔާރު މުޖުތާޒު ފަހުމީގެ ހާލު ސީރިއަސް ކަމުގެ މައުލޫމާތު ލިބިއްޖެއެވެ.
މައުލޫމާތު ލިބިފައި ވާ ގޮތުގައި ކޮވިޑް-19 އަށް ޓެސްޓު ކޮށްފައި ވަނީ އެ ބަލީގެ އަލާމާތްތައް ފެނިގެންނެވެ. މުޖުތާޒު ކޮވިޑަށް ޕޮޒިޓިވް ވެފައި ވަނީ މިމަހު 4 ވަނަ ދުވަހު ކަމަށް ވާއިރު، އެ ބައްޔަށް ޕޮޒިޓިވް ވުމުގެ ސަބަބުން އޭނާ ވަނީ ލ. ގަމު ހޮސްޕިޓަލުގައި އެޑްމިޓް ކޮށްފައެވެ.
މައުލޫމާތު ލިބިފައިވާ ގޮތުގައި އޭނާގެ ހާލު ގޯސްވެފައި ވަނީ އިއްޔެއެވެ. ނޭވާއަށް އުނދަގޫވެ ހާލު ދެރަވެގެން މުޖުތާޒު މާލެ ގެނެސްފައި ވަނީ ވެންޓިލޭޓަރު ގައެވެ. ނަމަވެސް މިހާރު އޭނާ ވެންޓިލޭޓަރުން ނަގާފައި ވާއިރު، ފަރުވާ ދެމުން އަންނަނީ ދަރުމަވަންތަ ހޮސްޕިޓަލުގައި ކަމަށް މައުލޫމާތު ލިބެއެވެ.
މުޖުތާޒު ސުޕްރީމް ކޯޓުގެ ފަނޑިޔާރު ކަމުގެ މަގާމުގައި ހުންނެވީ ސެޕްޓެމްބަރު 18، 2008 އިން ފެށިގެން އޮގަސްޓް 10، 2010 އާ ހަމައަށެވެ. ފަނޑިޔާރު ކަމުން އޭނާ ރިޓަޔާ ކުރެއްވީއެވެ.
