މޯލްޑިވްސް ޕޮލިސް ސާވިސްގެ ޓްރެފިކް މެނޭޖްމަންޓް ޑިޕާޓްމަންޓާއި އެލައިޑް އިންޝުއަރެންސް ކޮމްޕެނީ ގުޅިގެން ބާއްވާ ރައްކާ ރޯޑް ޝޯގެ ހިމެނޭ ފުރަތަމަ ހަރަކާތް ކަމަށްވާ ރައްކާ ރޯޑް ސޭފްޓީ ރަންގައި 800 އަށް ވުރެ ގިނަ މީހުން ބައިވެރި ވެއްޖެއެވެ.
ރައްކާ ރޯޑް ސޭފްޓީ ރަންގައި ބައިވެރިވުމުގެ ފުރުސަތު އިއްޔެގެ ނިޔަލަށް ހަމަވިއިރު ޖުމްލަ 850 މީހުން ބައިވެރިވެފައިވާ ކަމަށް ފުލުހުން ވަނީ ބުނެފައެވެ. ރައްކާ ރޯޑް ސޭފްޓީ ރަންގައި ރަޖިސްޓްރީވުން ކުރިއަށް ގެންގޮސްފައިވަނީ ރަން ފޯ މޯލްޑިވްސް ވެބްސައިޓް މެދުވެރިކޮށެވެ.
ފުލުހުން ބުނީ މަގުމަތީގެ ސަލާމަތާއި ރައްކާތެރިކަމާ ގުޅޭ މެޖެސުތައް ގިނަބަޔަކަށް ފޯރުކޮށްދިނުމުގެ ގޮތުން ކުރިއަށް ގެންދާ “ރައްކާ ރޯޑް ސޭފްޓީ ރަން” ކުރިއަށް ގެންދިއުމަށް ހަމަޖެހިފައިވަނީ ޖެނުއަރީ 8، 2021 ވަނަ ދުވަހުގެ 04:00 ގައި ހުޅުމާލޭގައި ކަމަށެވެ.
މި ދުވުން ޖެނުއަރީ 16 ވަނަ ދުވަހުގެ 06:00 އާ ހަމައަށް ކުރިއަށްދާއިރު މި ދުވުން ކުރިއަށްދާނީ 2018 ން 2020 އަށް ހިނގާފައިވާ މަގުމަތީގެ އެކްސިޑެންޓްތަކުގެ އަދަދު ކަމަށްވާ 5665 ހިމެނޭ ގޮތަށް ދުވުމުގައި ބައިވެރިވާ ދުވުންތެރިން ދުވާ ކިލޯ މީޓަރުން އެ އަދަދު އުނިކުރެވޭ ގޮތަށް ކަމަށް ފުލުހުން ބުނެއެވެ.
ފުލުހުން ބުނީ މި ދުވުމުގައި ބައިވެރިވާ ފަރާތްތަކަށް މަގުމަތީގެ ސަލާމަތާއި ރައްކާތެރިކަމަށް ހޭލުންތެރިކުރުމަށް ތަފާތު މެސެޖުތައް ހިމެނޭ ޓީޝާޓަކާއި މެޑަލްއެއް ދޭ ގޮތަށް ހަމަޖެހިފައިވާ ކަމަށެވެ.
