ގޭސް ފުޅިއެއް ގޮވާ، 2 މީހަކަށް އަނިޔާ ވެއްޖެއެވެ.
އެމްއެންޑީއެފުން ބުނީ ހ. ތިން ނޫން، ގޭގެ ފަސް ވަނަ ފްލޯގައި ހުރި ގޭސް ފުޅިއެއް ގޮވައިގެން އެމްއެންޑީއެފް ފަޔާ އެންޑް ރެސްކިއުގެ ސިފައިން ހަރަކާތްތެރިވާން ފަށާފައިވާ ކަމަށެވެ.
މި ހާދިސާގައި ފިހިގެން 2 މީހަކަށް އެކި ވަރުގެ އަނިޔާ ލިބިފައިވާ ކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ އަނިޔާ ލިބުނު 2 މީހުން އައިޖީއެމްއެޗުގައި ފަރުވާ ދެމުންދާ ކަމަށެވެ. އަނިޔާ ވެފައިވަނީ 2 ފިރިހެނުންނަށް ކަމަށް އެމްއެންޑީއެފުން ވަނީ ބުނެފައެވެ.
މި ހާދިސާގެ ރިޕޯޓު ލިބިފައިވަނީ މިއަދު 12:13 ހާއިރު ކަމަށް އެމްއެންޑީއެފުން ވަނީ ބުނެފައެވެ.
މިދިޔަ ނޮވެންބަރު މަހުގެ ތެރޭގައި ވެސް ގދ.ތިނަދޫ ފަޅުތެރޭގައި އޮތް "ރާސްތާ" ނަމަކަށް ކިޔާ ދޯންޏެއްގައި ގޭސް ފުޅިއެއް ލީކްވެގެން ވަނީ އަލިފާނުގެ ހާދިސާއެއް ހިނގާއެވެ. މި ހާދިސާގައި ފިހިގެން ލިބުނު އަނިޔާތަކަށް ފަރުވާ ދެމުން ދަނިކޮށް ދެ މީހަކު ވަނީ މަރުވެފައެވެ.
މި ހާދިސާގައި އެ ދޯނީގައި ތިބި 4 ދިވެހިންނަށް އަނިޔާވެފާވެއެވެ. އެ ހާދިސާގައި ފިހުނު މީހުންގެ ތެރެއިން ދެ މީހެއްގެ ހަށިގަނޑުގެ ބޮޑުބައެއް ފިހުނު ކަަމަށްމައުލޫމާތު ވަނީ ލިބިފައެވެ.
