"ވަގުތު" ނޫހުގެ ނޫސްވެރިންނަށް ބަޔަކު އިންޒާރު ދެމުން ދާތީ، އެ ނޫސްވެރިންނަށް ރައްކާތެރިކަން ފޯރުކޮށްދެމުން ދާ ކަމަށް ފުލުހުން ބުނެފިއެވެ.
'ދަ ޕްރެސް' އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ވަގުތު ނޫހަށް އެކި ގޮތްގޮތުން އިންޒާރު ދެމުންދާ މައްސަލައެއް ފުލުހުން ތަހުގީގު ކުރަމުންދާ ކަމަށެވެ. އަދި މި މައްސަލަ ތަހުގީގު ކުރަމުން ދާއިރު ވަގުތު ނޫހަށް ބޭނުންވާ ރައްކާތެރިކަން ފުލުހުން ފޯރު ކޮށްދެމުން ދާ ކަމަށް މީޑިއާ އޮފިޝަލް ވިދާޅުވިއެވެ.
ފުލުހުން ބުނީ މީޑިއާގެ ފަރާތްތަކަށް ދޭ މިފަދަ އިންޒާރުތައް ފުލުހުން ހަރުކަށި އިބާރާތުން ކުއްވެރި ކުރާ ކަމަށެވެ. އަދި މިފަދަ މައްސަލަތައް ހާއްސަ ސަމާލުކަމެއް ދީގެން ތަހުގީގުކޮށް ފިޔަވަޅު އަޅަމުން ގެންދާނެ ކަމުގެ ޔަގީންކަން ފުލުހުން ވަނީ އަރުވާފައެވެ.
ވަގުތު ނޫހުގެ ނޫސްވެރިނަށް ބަޔަކު އިންޒާރު ދެމުން ގެންދަނީ އެ ނޫހުން ޝާއިއު ކުރި ރިޕޯޓަކާ ގުޅިގެންނެވެ. "އައްޑޫ ހަރުކަށި ފިކުރުގެ ވިއުގަ - ފިތްކަނޑައިގެން ދާހާ ވަރުގަދަ!" މި ނަމުގައި އައްޑޫގައި ހަރުކަށި ފިކުރު އޮތް މިންވަރު ބަޔާންކޮށް ތަހުގީގީ ރިޕޯޓެއް އެ ނޫހުން ޝާއިއު ކުރީ މިދިޔަ ޑިސެމްބަރު މަހުގެ 31 ވަނަ ދުވަހެވެ.
ިމި ރިޕޯޓާ ގުޅިގެން އެ ނޫހުގެ ނޫސްވެރިނަށް އެކި ގޮތްގޮތުން މަރުގެ އިންޒާރު ވެސް ލިބެމުން އެބަ ދެއެވެ. އެކަމާ މޯލްޑިވްސް މީޑިއާ ކައުންސިލް (އެމްއެމްސީ) އަދި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއީ) އިން ވެސް ވަނީ ކަންބޮޑުވުން ފާޅުކޮށް ބަޔާން ނެރެފައެވެ.
