އެމްއެންޑީއެފް ފަޔާ އެންޑް ރެސްކިއު ސާވިސް (އެފްއާރްއެސް) އިން ފަރުމާކުރި ވައިބާ ސްޓިކާ ޕެކެއް ނެރެފިއެވެ.
މި ސްޓިކާ ޕެކް ނެރެދެއްވާފައި ވަނީ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލެވެ. މި ސްޓިކާތައް ނެރެދެއްވާފައި ވަނީ ކަޅުތުއްކަލާ ކޮށީގައި މާލޭ ފަޔާ ސްޓޭޝަނުން އިންތިޒާމު ކޮށްގެން އެ ސްޓޭޝަންގެ ސިފައިންނަށް ބޭއްވި ބްރޭވް ހާޓް ފަޔާ ފައިޓާސް ޗެލެންޖް 2020ގެ ތެރެއިންނެވެ.
މި ސްޓިކާތައް ފަރުމާ ކޮށްފައި ވަނީ އެފްއާރްއެސްގައި މަސައްކަތް ކުރާ ދެ މީހުން ކަމަށްވާ ވޮރަންޓް އޮފިސާ 3 އާސިމް ރަޝީދު އާއި ސްޓާފް ސާޖަންޓް ފާރޫގް އިސްމާއިލް އެވެ.
ޖުމްލަ 24 ސްޓިކާ ހިމެނޭ މި ސްޓިކާ ޕެކޭޖުގައި ހިމެނޭ ސްޓިކާތަކުން ދައްކުވައި ދޭނީ އެފްއާރުއެސްއާއި އާންމު ރައްޔިތުންނާ އޮންނަ ގުޅުމާއި އަލިފާން ނިއްވުމާ ގުޅޭގޮތުން އާންމު ރައްޔިތުން ހޭލުންތެރިކަން އިތުރުކުރުމުގެ އިތުރުން އެފްއާރުއެސްގެ އިމާޖެންސީ ނަންބަރުތަކާއި ތަފާތު ހޭލުންތެރިކަމުގެ މެސެޖުތަކެވެ.
މިއީ އާންމު ރައްޔިތުންނާ އޮންނަ ގުޅުން ބަދަހިކުރުމާއި އެފްއާރުއެސްގެ ހިލޭ ގުޅޭ ނަންބަރު 118 އިސްތިހާރު ކުރުމުގެ އިތުރުން އަލިފާނުގެ ހާދިސާތަކުން ރައްކާތެރިކުރުމަށް ހޭލުންތެރިކަން އިތުރުކުރުމުގެ މަގްސަދުގައި ފަރުމާކުރި ސްޓިކާ ތަކެކެވެ. މި ސްޓިކާތައް މިއަދުން ފެށިގެން އާންމުންނަށް ބޭނުން ކުރެވޭނެއެވެ.
