ކީރިތި ޤުރުއާން ބަލައިގެން ކިޔެވުމުގެ ވާޗުއަލް ގައުމީ މުބާރާތް 2020ގެ ނަތީޖާ ފާޅުކޮށް، މުބާރާތުގައި ވަނަތައް ހާސިލުކުރި ފަރާތްތަކަށް އިނާމު ހަވާލު ކޮށްފިއެވެ.
މި މުބާރާތް ޝަރަފުވެރިކޮށް، އެންމެ ޝަރަފުވެރި ވަނަތައް ހާސިލު ކުރެއްވޮ ފަރާތްތަކަށް އިނާމު ހަވާލު ކޮށްދެއްވީ ނައިބު ރައީސް ފައިސަލް ނަސީމެވެ.
މި މުބާރާތުގެ ނަތީޖާ ފާޅުކުރުމަށް މިއަދު ހެނދުނު އިސްލާމީ މަރުކަޒުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވަނީ މި އަހަރު ކޮވިޑް-19 ގެ ސަބަބުން ތައުލީމީ ދާއިރާއިން ގެއްލިގެން ދިޔަ ދުވަސްތައް އަނބުރާ ހޯދުމަށް އާ އަހަރާއެކު އާ އަޒުމެއްގައި މަސައްކަތް ކުރަންޖެހޭ ކަމަށް ވިދާޅުވެފައެވެ.
އަދި މި ކަމުގައި ހުރިހާ ބެލެނިވެރިން ވެސް، ދަރިވަރުންނަށް އިތުރަށް އެހީތެރިކަން ފޯރުކޮށް ދިނުމަށް އެދި ވަޑައިގެންނެވިއެވެ. މީގެ އިތުރުން، މި އަހަރުގެ މުބާރާތް ވާޗުއަލްކޮށް ކުރިއަށް ގެންދިއުމުގެ ކަންކަން އިންތިޒާމުކޮށް، މުބާރާތުގެ އެންމެހައި ކަންކަމުގައި ހަރަކާތްތެރިވެ ވަޑައިގެންނެވި ހުރިހާ ފަރާތްތަކަށް އެމަނިކުފާނު ވަނީ ޝުކުރު އަދާކުރައްވާފައެވެ.
ކީރިތި ޤުރުއާން ބަލައިގެން ކިޔެވުމުގެ ވާޗުއަލް ގައުމީ މުބާރާތް އިންތިޒާމު ކޮށްފައި ވަނީ ރާއްޖެއާއި ރާއްޖެއިން ބޭރުގައި ތިބި ދިވެހިންނަށް ވެސް މުބާރާތުގައި ބައިވެރިވެވޭ ގޮތަށެވެ. މިއީ، މި ގޮތަށް މިފަދަ މުބާރާތެއް ބޭއްވި ފުރަތަމަ ފަހަރެވެ. މި ރަސްމިއްޔާތުގައި މުޅި މުބާރާތުން އެއްވަނަ އަދި ދެވަނަ ހާސިލުކުރި ފަރާތްތަކަށް އިނާމު ހަވާލުކޮށްދެއްވީ ނައިބު ރައީސް ފައިސަލެވެ. އަދި، ޤުރުއާން ހިތުދަސް ކުރި ފަސް ހާފިޒުންނަށް ވެސް އެމަނިކުފާނު ވަނީ އިނާމު ހަވާލުކޮށް ދެއްވާފައެވެ.
މި މުބާރާތް ކުރިއަށް ގެންގޮސްފައި ވަނީ ދެ ކެޓަގަރީ އަކަށް ބަހާލައިގެންނެވެ. އެއީ މުޖައްވަދު (ދިގުރާގު) ކެޓެގަރީ އާއި ހަދަރު (ކުރުރާގު) ކެޓަގަރީއެވެ. ފައިނަލް ބުރުގައި މުޖައްވަދު (ދިގުރާގު) ކެޓަގަރީއަށް 34 ބައިވެރިން އަދި ހަދަރު (ކުރުރާގު) އަށް 309 ބައިވެރިން ވަނީ ކިޔަވާފައެވެ.
