ރާއްޖޭގައި ތިބި ބިދޭސީން އެމީހުންގެ ގައުމަށް އަނބުރާ ފޮނުވާލުމަށް ކުރާ މަސައްކަތުގެ ތެރެއިން މިހާތަނަށް މޯލްޑިވިއަންގެ ރިޕެޓްރިއޭޝަން ފްލައިޓްތަކުން 9600 އަށް ވުރެ ގިނަ ބަންގްލަދޭޝް މީހުން ފޮނުވާލައިފިއެވެ.
ގައުމީ އެއާލައިނުން ބުނީ، މިއަދު 200 ބަންގްލަދޭޝް މީހުން އަނބުރާ އެމީހުންގެ ރަށަށް ފޮނުވާލާފައިވާ އިރު އެއީ ރިޕެޓްރިއޭޝަން ފްލައިޓްގެ ގޮތުގައި ދަތުރު ކުރި 50 ވަނަ ފްލައިޓް ކަމަށެވެ. އަދި މިހާތަނަށް އެ ފްލައިޓްތަކުން 9633 ބަންގްލަދޭޝް މީހުން ފޮނުވާލާފައިވާ ކަމަށް މޯލްޑިވިއަނުން ބުނެއެވެ.
މޯލްޑިވިއަންގެ ފްލައިޓުގެ އިތުރުން ދިވެހި ސަރުކާރުން ޗާޓަރުކުރި ބިމާން ބަންގްލަދޭޝް އެއާވޭސްގެ ފްލައިޓެއްގައްޔާއި ބަންގްލަދޭޝް އަސްކަރިއްޔާގެ ފްލައިޓެއްގައި ވެސް ދެ ފަހަރެއްގެ މަތިން އެ ގައުމުގެ ރައްޔިތުން ފުރުވާލައިފައި ވެއެވެ.
ރިޕެޓްރިއޭޝަން ފްލައިޓްތަކުން ފޮނުވާލާ ބިދޭސީންގެ ތެރޭގައި ހިމެނެނީ އަމިއްލައަށް އެނބުރި ގައުމަށް ދާން ބޭނުންވާ ބިދޭސީންނާއި ރާއްޖޭގައި ގަވާއިދާ ހިލާފަށް ސައްހަ ލިޔުމެއް ނެތި އުޅޭ ބިދޭސީންނެވެ. މި މަސައްކަތަކީ މިނިސްޓްރީ އޮފް ފޮރިން އެފެއާޒާއި މިނިސްޓްރީ އޮފް އިކޮނޮމިކް ޑިވެލޮޕްމަންޓާއި މޯލްޑިވްސް އިމިގްރޭޝަންއާއި ގައުމީ އެއާލައިން މޯލްޑިވިއަން ގުޅިގެން ކުރިއަށްގެންދާ އޮޕަރޭޝަނެކެވެ.
މީގެ ކުރިން ފޮރިން މިނިސްޓްރީން ބުނެފައި ވަނީ މި މަހުގެ 10 ވަނަ ދުވަހާ ހަމައަށް ގަވާއިދާ ހިލާފާށް ސައްހަ ލިޔުމެއް ނެތި ރާއްޖޭގައި އުޅޭ 8741 ބަންގްލަދޭޝް މީހުން ފޮނުވާލާފައިވާ ކަމަށެވެ. އަދި ރާއްޖޭގައި ތިބި ބިދޭސީންގެ ތެރެއިން އަނބުރާ ގައުމަށް ދާން ބޭނުންވެފައި ތިބި ބިދޭސީންގެ ތެރެއިން 10،000 ވުރެ ގިނަ މީހުން މިހާތަނަށް ވަނީ އެމީހުންގެ ގައުމަށް ފޮނުވާލާފައެވެ.
ކޮވިޑް ބަލިމަޑުކަން ރާއްޖޭގައި ފެތުރެން ފެށުމާ އެކު ބިދޭސީންގެ ތެރެއިން އަނބުރާ ގައުމަށް ދާން ބޭނުންވި މީހުންގެ ތެރޭގައި އިންޑިއާ، ލަންކާ، ނޭޕާލް، ފިލިޕީންސް، ތައިލެންޑް އަދި އިންޑޮނޭޝިއާގެ ރައްޔިތުން ހިމެނެއެވެ.
