ނިޔަމަ ޕްރައިވެޓް އައިލެންޑްސް މޯލްޑިވްސް ރިސޯޓް މޮނިޓަރިންގެ ހާލަތަށް ގެންގޮސްފިއެވެ.
ހެލްތް އިމަޖެންސީ އޮޕަރޭޝަން ސެންޓަރުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ އެ ރިސޯޓް މޮނިޓަރިންގެ ހާލަތަށް ގެންގޮސްފައި ވަނީ މިއަދު ކަމަށެވެ. އަދި އެއީ އެ ރިސޯޓުން ކޮވިޑް-19ގެ 7 ޕޮޒިޓިވް ކޭސް ފެނުމާ ގުޅިގެން ކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ، އެ ރިސޯޓުން ޕޮޒިޓިވް ވެފައި ވަނީ 2 ފަތުރުވެރިންނާއި 5 ސްޓާފުން ކަމަށެވެ. އޭގެ ތެރެއިން 2 ސްޓާފުންނާއި 3 ސްޓާފުންގެ ފަރާތުން ބަލީގެ އަލާމާތް ފެނިގެން ޓެސްޓުކޮށް ޕޮޒިޓިވްވިއިރު، ދެން ތިބި 2 ސްޓާފުން ޕޮޒިޓިވްވެފައި ވަނީ ކޮންޓެކްޓް ޓްރޭސިންގެ ތެރެއިން ކަމަށެވެ.
އަދި އެ ރިސޯޓުން މިހާތަނަށް 17 ސާމްޕަލް ނަގާފައިވާ ކަމަށާއި، އެރަށުން ރެންޑަމް ސާމްޕަލް ނެގުމުގެ މަސައްކަތް ކުރަމުންދާ ކަމަށް ޑރ. ނަޒްލާ ވިދާޅުވިއެވެ. އެ ރިސޯޓް މޮނިޓަރިންގެ ހާލަތަށް ގެނެސްފައި ވުމާއެކު ނިޔަމަ ރިސޯޓަށް ސްޕްލިޓް ސްޓޭއަށް ދިއުން ވެސް ވަނީ ހުއްޓާލާފައެވެ.
ނިޔަމަ ރިސޯޓުން ފެނުނު 7 ކޭސްއާއެކު ޖުމްލަ 15 ކޭސްއެއް މިއަދު ރިސޯޓްތަކުން ވަނީ ފެނިފައެވެ. އަދި މީހުން ދިރިއުޅޭ ރަށްތަކުން 2 ކޭސްގެ އިތުރުން މާލެ ސަރަހައްދުން 30 ކޭސްއެއް ވަނީ ފެނިފައެވެ. މި ވަގުތު ކޮވިޑަށް ޕޮޒިޓިވް 558 މީހަކު ރާއްޖޭގައި ތިބި އިރު، އޭގެ ތެރެއިން 29 މީހަކަށް ދަނީ ހޮސްޕިޓަލުގައި ފަރުވާ ދެމުންނެވެ.
މިއާއެކު ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު މިވަނީ 13738 އަށް އަރާފައެވެ. އަދި ބަލިން ރަނގަޅުވި މީހުންގެ އަދަދު 13125 އަށް އަރާފައި ވާއިރު މި ބަލީގައި ނިޔާވީ 48 މީހެކެވެ. މި ބައްޔަށް ޕޮޒިޓިވް ވެފައި ވަނިކޮށް ނިޔާވި 7 މީހަކީ މި ބަލީގައި ނިޔާވި މީހުން ނޫން ކަމަށް ވަނީ ނިންމާފައެވެ.
