ނިޝާން މުލީގޭ ޝަރަފުގެ އިއްޒަތުގެ ވެރިކަމުގެ ލަގަބު ކުޅިވަރާ ބެހޭ ގައުމީ މަޖިލީހުގެ ކުރީގެ ރައީސް އިބްރާހިމް އިސްމާއިލް އަލީއަށް އަދި ނިޝާން ދިޔަމިގިލި ޝަރަފުގެ އިއްޒަތުގެ ވެރިކަމުގެ ލަގަބު މޯލްޑިވްސް ބްރޯޑްކާސްޓިން ކޮމިޝަނުގެ ކުރީގެ ރައީސް ބަދްރުއް ނަސީރަށް އަރުވައިފިއެވެ.
އެ ދެ ބޭފުޅުންނަށް ދިވެހި ދައުލަތުގެ އިއްޒަތް އެރުވީ މިހާރު ޖުމްހޫރީ މައިދާނުގައި ކުރިއަށް ދާ އެއްބައިވަންތަ ކަމުގެ ދުވަހުގެ ޖަލްސާގައެވެ. އެ ދެ ބޭފުޅުންނަށް މި ލަގަބު އަރުއްވައި ދެއްވީ ރައީސް އިބްރާހިމް މުހައްމަދު ސޯލިހެވެ.
މ. މަހުމާވިލާ، އިބްރާހިމް އިސްމާއިލް
އައްސުލްޠާން މުހައްމަދު ޝަމްސުއްދީނަށް ނިސްބަތްކުރެވޭ ނިޝާން މުލީގޭ ޝަރަފުގެ އިއްޒަތް (ނ.މ.ޝ.އ) މިރޭ އެރުވި އިބްރާހީމް އިސްމާއިލަކީ ކުޅިވަރުގެ ތާރީހުގައި ފަހިރުވެރި ކާމިޔާބީތަކެއް ހާސިލު ކުރައްވައިފައިވާ، ކުޅިވަރު ކުރިއެރުވުމާއި، ކުޅިވަރު ތަރައްގީ ކުރެއްވުމުގައި ފާހަގަކުރެވޭ މަސައްކަތްތަކެއް ކުރައްވާފައިވާ ބޭފުޅެކެވެ. ކޮޅުމަޑުލު ތިމަރަފުށްޓަށް އުފަން އިބްރާހީމް އިސްމާއިލް ސަރުކާރުގެ ހިދުމަތާ ގުޅިވަޑައިގަތީ 1970 ވަނަ އަހަރުގެ އޮގަސްޓު މަހުގައެވެ. ފުރަތަމަ އަދާކުރެއްވީ މިނިސްޓްރީ އޮފް ހެލްތުގެ އިނގިރޭސި ކާތިބުކަމުގެ ވަޒީފާއެވެ. އަދި އެއަށްފަހު ޓީޗިންގްގެ ދާއިރާއާއި، އެޑިޔުކޭޝަނަލް މެނޭޖްމަންޓްގެ ދާއިރާއިން އޭނާ ވަނީ އޮސްޓްރޭލިޔާއާއި، އެމެރިކާ އަދި އިންޑިޔާއިން މަތީ ތައުލީމު ހާސިލުކުރައްވާފައެވެ.
އެކި ކުޅިވަރުތައް ކުޅުއްވުމުގައި ފާހަގަ ކޮށްލެވޭ ބޭފުޅެއް ކަމުގައިވާ އިބްރާހީމް އިސްމާއިލް އެންމެ ބޮޑަށް މަޝްހޫރުކަން ހޯއްދަވާފައި ވަނީ މޮޅު ފުޓްބޯޅަ ކުޅުންތެރިއެއްގެ ގޮތުގައެވެ. އޭނާ ކުޅިވަރުގެ ދާއިރާއިން ހޯއްދަވާފައިވާ ބައެއް ކާމިޔާބީތަކުގެ ތެރޭގައި އެންމެ މޮޅު މިޑްފީލްޑަރުކަމާއި، ގައުމީ ފުޓްބޯޅަ ޓީމަށް ކުޅުއްވުމާއި، ފީފާގެ ރެފްރީއަކަށް ވެވަޑައިގަތުން ހިމެނެއެވެ. ރާއްޖޭގެ ގައުމީ ފުޓްބޯޅަ ޓީމުގެ ފުރަތަމަ ކެޕްޓަނަކީ ވެސް އިބްރާހީމް އިސްމާއިލެވެ.
މީގެ އިތުރުން ރާއްޖޭގެ އޮލިމްޕިކް ކޮމިޓީއަށާއި ފުޓްބޯލް އެސޯސިއޭޝަނަށް ދިގު މުއްދަތެއްގައި ހިދުމަތް ކުރައްވައިފައިވާ އިބްރާހީމް އިސްމާއިލް ވަނީ 2012 ވަނަ އަހަރު އިންޑިއަން އޯޝަން އައިލެންޑް ގޭމްސްގެ އެވޯޑާއި، 2013 ވަނަ އަހަރު އޯސީއޭ ރީޖަންގެ ސްޕޯޓްސް އެވޯޑު ހާސިލު ކުރައްވާފައެވެ އަދި، 1982 ވަނަ އަހަރު ކުޅިވަރުގެ ރޮނގުން އާންމު ހިދުމަތުގެ ހިތްވަރު ދިނުމުގެ އިނާމާއި، 2007 ވަނަ އަހަރު ކުޅިވަރަށް ހިދުމަތް ކުރުމުގެ ދާއިރާއިން ޝަރަފުވެރި ކަމުގެ އިނާމު އޭނާއަށް ލިބިވަޑައިގެންނެވިއެވެ.
މއ. ވިލުވެލި، ބަދުރުއް ނަސީރު
ނިޝާން ދިޔަމިގިލީ ޝަރަފުގެ އިއްޒަތް (ނ.ދ.ޝ.އ) އަކީ އައްސުލްޠާން މުހައްމަދު އިޔާސުއްދީނަށް ނިސްބަތް ކޮށްފައިވާ އިއްޒަތެކެވެ. މިރޭ މި އިއްޒަތް އެރުވި ބަދުރުއްނަސީރަކީ ބްރޯޑްކާސްޓިން ދާއިރާއަށް 40 އަހަރަށްވުރެ ދިގު މުއްދަތެއްގައި ހިދުމަތް ކުރައްވާފައިވާ ބޭފުޅެކެވެ. 1967 ވަނަ އަހަރުގެ ޖޫން މަހު އޭނާ ރޭޑިއޯ ބްރޯޑްކާސްޓިންގެ ދާއިރާއާ ގުޅިވަޑައިގަތީ ވުޒާރަތުލް މާލިއްޔާ (ބ)ގެ 2 ނަންބަރު އޮޕަރޭޓަރެއްގެ ވަޒީފާއިންނެވެ.
1971 ވަނަ އަހަރު ރޭޑިއޯ ޓެލެވިޒަން ސިންގަޕޫރުގައި ފުރިހަމަ ކުރެއްވި ތަމްރީނާއެކު އޭނާ ވެވަޑައިގަންނެވީ ރޭޑިއޯ ބްރޯޑްކާސްޓިން ދާއިރާއިން ރާއްޖެއިން ބޭރުން އެންމެ ފުރަތަމަ ތައުލީމު ހާސިލުކުރެއްވި ބޭފުޅަށެވެ. މީގެ އިތުރުން، ނެދަލެންޑްސްއާއި އޮސްޓްރޭލިއާއިން ވެސް އޭނާ ވަނީ ރޭޑިއޯ ޕްރޮގްރާމް އުފެއްދުމާއި ހުށަހެޅުމާބެހޭ ތަފާތު ތަމްރީނު ޕްރޮގްރާމްތައް ފުރިހަމަ ކުރައްވާފައެވެ.
ރޭޑިއޯގެ ހިދުމަތްތައް ތަރައްގީކޮށް ކުރިއެރުވުމުގައި ބަދުރުއްނަސީރަކީ ވަރަށް އިސް ދައުރެއް އަދާ ކުރައްވާފައިވާ ބޭފުޅެކެވެ. މިގޮތުން، 1980 ވަނަ އަހަރު ރޭޑިއޯ މޯލްޑިވްސްގެ ޕްރޮގްރާމްތަކަށް ގެނެވުނު ބަދަލުތަކާއި، ރާއްޖޭގެ ހުރިހާ ކަންކޮޅަކަށް ރޭޑިއޯގެ ސިގްނަލް ލިބޭނެގޮތް ހެދުމަށް ފަށައިގެން ކުރިއަށްގެންދިޔަ ހާއްސަ މަޝްރޫއުގައި އޭނާ އަދާކުރައްވާފައިވާ ދައުރު ފާހަގަކޮށްލެވެއެވެ.
28 އަހަރަށްވުރެ ދިގު މުއްދަތެއްގައި މި ދާއިރާގައި ހިދުމަތް ކުރެއްވުމުގައި ހޭދަ ކުރެއްވުމަށްފަހު، 1995 ވަނަ އަހަރު ބަދުރުއްނަސީރު އެ ހިދުމަތުން ވަކިވެ ވަޑައިގެންނެވިއެވެ. އަދި، ޕްރައިވެޓް ސެކްޓާގައި އަހަރުތަކަކު މަސައްކަތް ކުރެއްވުމަށްފަހު، ދިވެހިރާއްޖޭގެ އަޑުގައި ކުރިން އަދާކުރެއްވި ޑިރެކްޓަ ޖެނެރަލް ކަމުގެ މަގާމާ 2004 ވަނަ އަހަރުގެ އޮކްޓޫބަރު މަހު އަލުން ގުޅިވަޑައިގެންނެވިއެވެ.
ބަދުރުއްނަސީރަކީ، ރާއްޖޭގައި ކޮމިއުނިޓީ ރޭޑިއޯ ތައާރުފުކުރުމާއި، ޒުވާނުންގެ އާބާދީއަށް އަމާޒުކޮށްގެން އެފްއެމް ރޭޑިއޯގެ ހިދުމަތް ތައާރުފުކުރުމުގައި އިސް ދައުރެއް އަދާކުރައްވާފައިވާ ބޭފުޅެކެވެ. ރާއްޖޭގެ އަޑުގެ ވަޒީފާއިން އޭނާ ވަކިވެ ވަޑައިގަތީ، 65 އަހަރުވެގެން، 2011 ވަނަ އަހަރުއެވެ. އަދި އެއަށްފަހު މޯލްޑިވްސް ބްރޯޑްކާސްޓިން ކޮމިޝަންގެ ފުރަތަމަ ރައީސްކަން ތިން އަހަރަށްވުރެ ގިނަ ދުވަހު ކުރެއްވުމަށްފަހު، ބްރޯޑްކާސްޓިންގްގެ ދާއިރާއާ މުޅިން ވަކިވެ ވަޑައިގަތީ 2013 ވަނަ އަހަރުގެ ތެރޭގައެވެ. ބަދުރުއްނަސީރަށް ވަނީ މިނިވަން 25ގެ އާންމު ހިދުމަތުގެ އިނާމު ވެސް ލިބިވަޑައިގެންފައެވެ.
