ރާއްޖެއިން ބޭރުގައި ހިންގާ އާބިޓްރޭޝަނަކާ ގުޅިގެން ރާއްޖޭގައި ފުރަތަމަ ފަހަރަށް ނެރުނު ވަގުތީ އަމުރު ތަންފީޒު ކުރުން ދިވެހިރާއްޖޭގެ ސުޕްރީމް ކޯޓުން ހުއްޓުވައިފިއެވެ.
މިއީ ޖުމެއިރާ ވިޓަވެލި ރިސޯޓް ހިންގުމާ ބެހޭގޮތުން ޖުމެއިރާ މެނޭޖްމަންޓް ސާވިސް ކިޔާ ކުންފުންޏަކާއި އެސްޕީއެޗް ކިޔާ ކުންފުންޏަކާ ދެމެދު ހަދާފައިވާ އެއްބަސްވުން އެސްޕީއެޗް އިން ބާތިލްކުރި މައްސަލައިގެ އާބިޓްރޭޝަނެވެ. މި އާބިޓްރޭޝަން ހިނގަމުން ދަނީ ސިންގަޕޫރުގައެވެ.
މި މައްސަލާގައި ރާއްޖޭގެ ހައިކޯޓުން އަމުރު ނެރުނީ ޖުމެއިރާގެ އެދުމަކަށެވެ. އެގޮތުން މިދިޔަ މަހު ހައިކޯޓުން ވަނީ އާބިޓްރޭޝަންގައި ހިނގާ މައްސަލަ ނިމެންދެން ރިސޯޓް ހިންގުމުގެ ހައްގު ޖުމެއިރާއަށް ގެއްލޭނެ ފަދަ އެއްވެސް ފިޔަވަޅެއް ނޭޅުމަށާއި އެއްބަސްވުން ބާތިލް ކުރުމުގެ ކުރިން އޮތް ހާލަތު ދެމެހެއްޓުމަށް އަމުރުކޮށްފައެވެ.
ހައި ކޯޓުގެ އަމުރު ތަންފީޒު ކުރަން ޖުމެއިރާއިން ސިވިލް ކޯޓަށް ހުށަހެޅިއިރު، ހައި ކޯޓުގެ އެ އަމުރު އިސްތިއުނާފް ކުރަން އެސްޕީއެޗުން އޮތީ ސުޕްރީމް ކޯޓަށް ހުށަހަޅައިފައެވެ. އަދި އެސްޕީއެޗުން ވަނީ ސުޕްރީމް ކޯޓުން މައްސަލަ ނިމެންދެން ހައި ކޯޓުގެ އަމުރު ތަންފީޒު ކުރުން މަޑު ޖައްސާލަން އަމުރެއް ނެރެ ދިނުމަށް ވެސް އެދިފައެވެ.
އެސްޕީއެޗުން އެދުނު ކަންތައްތަކަށާއި ހުށަހަޅާފައިވާ ލިޔެކިއުންތައް ދިރާސާ ކުރުމަށްފަހު ސުޕްރީމް ކޯޓުން އަމުރު ނެރެފައި ވަނީ މިދިޔަ ބުދަދުވަހެވެ. އެ އަމުރުގައި ވަނީ މި މައްސަލައިގެ ހުކުމް ތަންފީޒު ކުރުމަށް ޖުމައިރާއިން ސިވިލް ކޯޓަށް ހުށަހަޅާފައި ވުމާއެކު އެންމެ އަދުލުވެރި ގޮތަކީ ސުޕްރީމް ކޯޓުން މައްސަލަ ނިމެންދެން ހައި ކޯޓުގެ އަމުރު ތަންފީޒު ކުރުން މަޑުޖައްސާލުން ކަމަށެވެ. އެހެންކަމުން، އެ އަމުރު ތަންފީޒު ކުރުމުގެ ގޮތުން މިވަގުތު އެއްވެސް ފިޔަވަޅެއް ނޭޅުމަށް އަންގާ ކަމަށް އެ އަމުރުގައި ވެއެވެ.
ސުޕްރީމް ކޯޓުން އެ އަމުރު ނެރުނީ ތިން ފަނޑިޔާރުންގެ އިއްތިފާގުންނެވެ. އްވީއެއީ ފަނޑިޔާރު އަލީ ރަޝީދު ހުސައިނާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.
