އިންޑިއާ ސަރުކާރުން ދިވެހިރާއްޖެއަށް ދީފައިވާ ޑޯނިއާ މަތިންދާބޯޓުގައި އަނެއްކާވެސް ބަލި މީހަކު މާލެ ގެނެސްފިއެވެ.
އެމްއެންޑީއެފުން ބުނީ ހާލުބޮޑު ބަލި މީހަކު މިރޭ 19:20ގައި މާލެ ގެނެސްފައިވާ ކަމަށެވެ. އެ މީހާ ގެނެސްފައި ވަނީ ލ އަތޮން ކަމަށާއި އޭނާ ގެނައީ އެމްއެންޑީއެފްގެ ނޮދާން ކޮމާންޑްސް އިންނެވެ.
މިރޭ ގެނައި މީހާއަކީ 35 އަހަރުގެ އަންހެނެކެވެ.
ބަލި މީހުން ގޮވައިގެން އެ ބޯޓް ދަތުރުތައް ފަށާފައި ވާއިރު، އެމްއެންޑީއެފުން ބުނެފައި ވަނީ، އެ ބޯޓު ގެނައީ އެމްއެންޑީއެފްގެ ކޯސްޓްގާޑްގެ ބެލުމުގެ ދަށުން ބޭނުން ކުރުމަށް ކަމަށެވެ.
އަދި ދިވެހިރާއްޖޭގެ ކަނޑުގެ ސަރަޙައްދު ބެލެހެއްޓުމަށާއި، ދިވެހިރާއްޖޭގެ މަސްކަނޑުތަކުން ގަވާއިދާ ހިލާފަށް މަސްވެރިކަން ކުރާ ފަރާތްތައް މޮނިޓާ ކުރުމަށާއި، ދިވެހިރާއްޖޭގެ ކަނޑުގެ ސަރަހައްދު ބޭނުން ކޮށްގެން ކުރެވޭ ޑްރަގްސް އާއި މަނާ އެހެނިހެން ތަކެތީގެ ވިޔަފާރި އާއި އިންސާނީ ވަގުފާރި ހުއްޓުވުމަށެވެ.
މީގެ އިތުރުން ކަނޑުމަތީގައި ހާލުގައި ޖެހޭ ފަރާތްތައް ހޯދުމަށާއި، އެއްތަނުން އަނެއްތަނަށް ބަލިމީހުން އުފުލުމަށާއި އަދި އެހެނިހެން އިންސާނީ އެހީ ފޯރުކޮށްދިނުމަށް ކަމަށް އެމްއެންޑީއެފުން ވަނީ ބުނެފައެވެ.
