މާލެ ސަރަހައްދުގައި ސިފައިންގެ ތަމްރީނެއް ކުރިއަށް ގެންދިއުމަށް ނިންމާފައިވާ ކަމަށް ޑިފެންސް މިނިސްޓްރީން ބުނެފިއެވެ.
އެމްއެންޑީއެފުން ބުނީ އެ އަސްކަރީ ތަމްރީނު ކުރިއަށް ގެންދިއުމަށް ނިންމާފައި ވަނީ މި މަހުގެ 20 އިން 24ގެ ނިޔަލަށް ކަމަށެވެ.
އެ ތަމްރީނު ބާއްވަން ހަމަޖެހިފައި ވަނީ ހުޅުލެ، ހުޅުމާލެ އަދި މާލޭގައި ކަމަށާއި އެ ތަމްރީނުގައި ހުޅުމާލެ ފޭސް 2 ގައި އާންމުން ދިރިއުޅޭ ތަންތަނާއި ދުރު ހިސާބުތަކުގައި ބްލޭންކްސް އަދި ޕައިރޯޓެކްނީކްސް ބޭނުން ކުރަން ހަމަޖެހިފައިވާ ކަމަށްވެސް އެމްއެންޑީއެފުން ބުނެއެވެ.
މިދިޔަ މަހު ތެރޭ ވެސް ގިނަ ތަމްރީރުތަކެއް އެމްއެންޑީއެފުން ވަނީ ކުރިއަށް ގެންގޮސްފައެވެ.
އެމްއެންޑީއެފުން ދަނީ ދޭތެރެ ދޭތެރެއިން ހަތިޔާރާއެކު މިފަދަ އަސްކަރީ ތަމްރީނުތައް ބާއްވަމުންނެވެ.
އަދި މިއީ ރާއްޖޭގެ ސަލާމަތަށް ނުރައްކަލެއް އޮވެގެން ކުރިއަށް ގެންދާ ތަމްރީނު ތަކެއް ނޫން ކަމަށް އެމްއެންޑީއެފުން ވަނީ މީގެ ކުރިން ވެސް ބުނެފައެވެ.
