ދިވެހި ދައުލަތުން މި އަހަރު ދޭ އެކިއެކި އިނާމުތައް ދިނުމަށް ބާއްވާ ރަސްމީ ޖަލްސާ، މި މަހުގެ 26 ވާ ހޮނިހިރު ދުވަހުގެ ރޭ ބާއްވާ ގޮތަށް ހަމަޖައްސައިފިއެވެ.
ރައީސް އޮފީހުން ބުނީ މި ޖަލްސާ އޮންނާނީ، 26 ވަނަ ދުވަހުގެ ރޭ 8:30 ގައި ޖުމްހޫރީ މައިދާނުގައި ކަމަށެވެ. އަދި މި ޖަލްސާ ބާއްވަނީ ދިވެހިންގެ އެއްބައިވަންތަކަމުގެ ދުވަހާ ގުޅިގެން ކަމަށާއި މި ޖަލްސާގައި ދެއްވާ އިނާމުތަކުގެ ތެރޭގައި، ގައުމީ އިނާމާއި، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމު ހިމެނެއެވެ.
ދިވެހި ދައުލަތުން ދޭ އެކިއެކި އިނާމުތައް ދިނުމަށް ބާއްވާ ޖަލްސާ އިންތިޒާމު ކުރަނީ، ހޯމް މިނިސްޓްރީންނެވެ. އަދި މި ޖަލްސާގެ ކަންތައްތައް ރާވަމުން ގެންދާނީ، އެޗްޕީއޭގެ އިރުޝާދާއެކު ކޮވިޑުގެ ހާލަތާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތަކާ އެކު ކަމަށް ރައީސް އޮފީހުން ބުނެއެވެ. އެހެންކަމުން، މިއަހަރުގެ ޖަލްސާއަށް ދައުވަތު އަރުވާ ބޭފުޅުންގެ އަދަދު، އެހެން އަހަރުތަކަށް ވުރެ މި އަހަރު މަދުވާނެ ކަމަށް އެ އޮފީހުން ބުނެއެވެ.
މިދިޔަ އަހަރުން ފެށިގެން ދައުލަތުން ދޭ އިނާމުތައް ދޭނީ ގައުމީ ދުވަހުގެ ރަސްމީ ޖަލްސާގައި ކަމަށް ވަނީ ކަނޑައަޅާފައެވެ. ނަމަވެސް މިއަހަރު ކޮވިޑްގެ ސަބަބުން ގައުމީ ދުވަހުގެ ޖަލްސާ ނުބާއްވާ ގޮތަށް ވަނީ ކަނޑައަޅާފައެވެ. އެހެންކަމުން ކޮވިޑްގެ ހާލަތު އާންމު ހާލަތަށް ބަދަލުވުމުން މިއަހަރުގެ އިނާމު ދިނުމުގެ ޖަލްސާ ވަކިން ބާއްވާ ގޮތަށް މީގެ ކުރިން ވަނީ ކަނޑައަޅާފައެވެ.
ގައުމީ އިނާމާ ބެހޭ ކޮމިޓީން ހާމަކޮށްފައިވާ މައުލޫމާތުތަަކށް ބަލާއިރު، މިއަހަރުގެ އިނާމަށް 26 ދާއިރާއަކުން ޖުމްލަ 94 ހުށަހެޅުމެއް ލިބިފައިވެއެވެ.
ސަރުކާރުން ދެމުން ގެންދާ ގައުމީ އިނާމަކީ، ދިވެހި ގައުމާއި ދިވެހި މުޖުތަމައުގެ ލާބައާއި މަންފާއަށްޓަކައި ވަކިވަކި ފަރުދުންނާއި، މަދަނީ މުއައްސަސާތަކުންނާއި، މަދަނީ ޖަމްއިއްޔާތަކާއި ޖަމާއަތްތަކުންނާއި، ވިޔަފާރި އިދާރާތަކުން ދެމެހެއްޓެނިވި ގޮތެއްގައި ދިވެހި ގައުމުގެ ތަރައްގީއަށް ކުރަމުންގެންދާ މަސައްކަތްތަކުގައި، އެފަރާތްތަކުން ހޯދާ ކުރިއެރުންތަކުގެ ސަބަބުން މުޖުތަމައަށް ކުރާ ފައިދާ ބަލައިގަނެ، އެކަންކަމުގެ އަގު ވަޒަންކޮށް، އެފަރާތްތަކަށް ހިތްވަރުދިނުމުގެ މަގުސަދުގައި ދޭ އިނާމެކެވެ.
ސަރުކާރުން އެ އިނާމު ފުރަތަމަ ދޭން ފެށީ، އާންމު ހިދުމަތުގެ އިނާމުގެ ނަމުގައި 1979 ވަނަ އަހަރުއެވެ. އެ އަހަރުން ފެށިގެން 2007 ވަނަ އަހަރުގެ ނިޔަލަށް، މި އިނާމު ގަވާއިދުން ދެމުން ގެންގޮސްފައި ވާއިރު، 2009 ވަނަ އަހަރުން ފެށިގެން މި އިނާމު ދެމުން ގެންދަނީ، ގައުމީ އިނާމުގެ ނަމުގައެވެ.
ގައުމީ އިނާމުގެ ގޮތުގައި ދެމުން ގެންދަނީ ޝަރަފުވެރިކަމުގެ ގައުމީ އިނާމާއި، ހިތްވަރުދިނުމުގެ ގައުމީ އިނާމެވެ. ޝަރަފުވެރިކަމުގެ ގައުމީ އިނާމަކީ، ގައުމާއި މުޖުތަމައަށް ފައިދާހުރިގޮތެއްގައި، ދިގު މުއްދަތަކަށް ހިދުމަތް ކުރައްވާފައިވާ ބޭފުޅުންނަށް ދޭ އިނާމެކެވެ. ހިތްވަރު ދިނުމުގެ ގައުމީ އިނާމަކީ، އެކަށީގެންވާ މުއްދަތެއްގައި، ދެމެހެއްޓެނިވި ގޮތަކަށް ހިދުމަތް ކުރައްވަމުން ގެންދަވާ ބޭފުޅުންނަށާއި ފަރާތްތަކަށް ދޭ އިނާމެކެވެ.
