ޅ. މާފިލާފުށީގައި ހުންނަ ސިފައިންގެ ޓްރެއިނިންގް ސެންޓަރުގައި "ސެނަހިޔާ ނޮދަން" ގެ ނަމުގައި ކްލިނިކެއް ހުޅުވައިފިއެވެ.
ކްލިނިކް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ، ކޮންމެ ސިފައިންގެ މީހަކީ ގާބިލް، ޕްރޮފެޝަނަލް، ހަށިހެޔޮ، "ފައިޓިންގް ފިޓް" ސޯލްޖާއެއްގެ ގޮތުގައި ބިނާކުރުމަށްޓަކައި، ދޭންޖެހޭ ތަމްރީނުތައް ދީ، ގައުމަށް ކުރިމަތިވެދާނެ ނުރައްކަލުގެ ހާލަތްތަކާ ކުރިމަތިލުމަށް ތައްޔާރުކުރަނީ ދައުލަތުން ބޮޑު ހޭދައެއް ކޮށްގެން ކަމަށެވެ.
އަދި ގައުމީ ވާޖިބަކަށް ސިފައިން ތައްޔާރުކުރާއިރު، ސިއްހީގޮތުން ސިފައިންނަށް ލިބޭ ޒަހަމްތަކާއި އެނޫންވެސް ސިއްހީ ފަރުވާއަށް ބޭނުންޖެހިއްޖެ ހާލަތެއްގައި، އެހިދުމަތް އެންމެ އެކަށޭނަގޮތުގައި ފޯރުވައިދިނުމަކީ، ގައުމީ ސަލާމަތާވެސް ގުޅިފައިވާ މުހިންމު މަސްއޫލިއްޔަތެއް ކަމަށް ވެސް މާރިޔާ ވިދާޅުވިއެވެ.
މިނިސްޓަރު ވަނީ ކޮވިޑް-19ގެ ދަތި އުނދަގޫ ހާލަތުގައި ގުޅިގެން، އެހާމެ ފުރިހަމައަށް އެ ކްލިނިކްގެ މަސައްކަތް ނިންމާފައިވާތީ، ސިފްކޯއަށާއި، އެމްއެންޑީއެފްގެ ސާޖަން ޖެނެރަލް ކާނަލް ޑރ. އަލީ ޝާހިދަށާއި މެޑިކަލް ކޯގެ ސިފައިންނަށް ޝުކުރެއް ދަންނަވައިފައެވެ.
މީގެ އިތުރުން ސިފައިންގެ 66 ވަނަ އަސާސީ ތަމްރީނު ކޯހުން ވަނަތައް ހާސިލް ކުރި ދަރިވަރުންނަށް ތައްޓާއި ހަނދާނީ ލިޔުން ދެއްވުމަށް، ބޭއްވި ރަސްމިއްޔާތުގައި މިނިސްޓަރު ވިދާޅުވީ ދިވެހި ސިފައިންނަކީ ދިވެހި ރައްޔިތުންގެ ފުރިހަމަ އިތުބާރާއި އިހްތިރާމް ހާސިލްކޮށްފައިވާ، ގާބިލް، ސިފަވަންތަ އަހްލާގެއްގެ މަތީގައި ތިބޭ، ޕްރޮފެޝަނަލް ބައެއްގެ ކަމަށް ވިދާޅުވެފައެވެ.
